2.000 hildakoren langa gainditu zuen gaitzak atzo, eta, beste zortzi pertsona hilda, 2.013 lagunek galdu dute bizia dagoeneko Euskal Herrian; datu ofizialen arabera, betiere. Horietako zazpi Araban, Bizkaian eta Gipuzkoan hil dira –ez dute zehaztu zer probintziatan–, eta bakarra Nafarroan.
Kasuen kopuruari dagokionez, beste hemezortzi kasu detektatu dituzte PCR proben bidez Hego Euskal Herrian, hau da, atzoko zenbaketan bezainbeste. Horietako gehienak (bederatzi) Bizkaian atzeman dituzte, eta bost Nafarroan, eta lau Araban. Gipuzkoan, berriz, ez dute kasurik detektatu, atzoko zenbaketan bezala. PCR eta test azkarrak gehituta, berriz, 131 positibo egon ziren atzo Araban, Bizkaian eta Gipuzkoan.
Ospitaleratuen kopurua zenbatekoa den ere iragarri dute: izurria zabaltzen hasi zenetik, 9.044 pertsona ospitaleratu behar izan dituzte Hego Euskal Herriko erietxeetan, beste bost azken 24 orduetan.
