Herriko bozak

Baionako berdeek Etxetoren alde bozkatzera deitu dute

Baiona Berdea eta Elkarkidearen kanpaina bukaera «desastre totala» izan dela erran dute, eta salatu dute Jean Rene Etxegarairen aldeko kanpaina egin duten batzuek BBEren bozketan parte hartu dutela. Jose Bove eurodiputatu ohiak eta François Alfonsi eurodiputatuak Etxegarairen alde bozkatzera deitu dute.

Sophie Bussiere, Ipar Euskal Herriko EELVko koordinatzailea eta Baiona Berdea eta Elkarkideko hautagaia. BOB EDME
Ekhi Erremundegi Beloki.
2020ko ekainaren 4a
11:15
Entzun

Giroa mingosten ari da Baionako herriko bozen bigarren itzuliaren harira. Baionako EELV Europa Ekologia-Berdeak alderdiak Henri Etxeto sozialista bozkatzera deitu du agiri batean, eta salatu du konfinamenduak iraun duen bi hilabeteetan kanpoko indar batzuk Baiona Berdea eta Elkarkidearen erabakian eragiten saiatu direla, Jean Rene Etxegarai auzapeza berriz hautatua izan zedin. «EELVk ez du ezkerra galaraziko Baionan».

«Zer galtzea», «desastre totala», «pena», «lotsa»... hitz gogorrak erabili ditu Baionako EELV taldeak. Joan den larunbatean, Henri Etxetorekin aliantzarik ez egitea erabaki zuten ezkerreko abertzaleak, ekologistak eta Frantzia Intsumisoaren zati bat batzen dituen Baiona Berdea eta Elkarkideako kideek, bi bozen aldearekin. Erabaki hori ulergaitza zaie ekologistei: «Nola ukatu liteke ezkerreko hiru zerrenden aliantza, negoziazioan BBEko kideek emandako mandatuak eskatzen zuen guzia lortu ondotik?».

EELVren hitzetan, konfinamenduak iraun duen bi hilabeteetan zehar, BBE zerrendatik kanpo «suntsitze sistematiko bat» antolatua izan da, «fake news-en bidez», eta horrek bigarren itzulirako aliantza zabala ezinezkoa zelako ideia garatu du. «Haien helburua, erabat asumitua, auzapez abertzale-konpatible baten figura santifikatuaren inguruan biltzen den orain arteko taldea berriz hautatua izatea. Momentu bakar batean ere ez dute errealitatea aipatu: Jean Rene Etxegarai UDIk, Errepublikanoek eta Martxan-ek babestutako zerrenda baten buru da». Berdeen hitzetan, 10 euro ordaintzen zituen edonor BBEko kide egin zitekeenez, Etxegarairen zerrendaren alde kanpaina egin duten pertsona batzuk azken biltzar nagusian bozkatzera joan ziren.

Baionako EELVk eskerrak eman dizkio Jean Claude Iriart BBEko zerrendaburuari, «baldintza zailetan» kanpaina eramateagatik; «Baionak eta Euskal Elkargoak balio handiko hautetsi bat galduko dute agintaldi honetan». Baina agirian erabilitako tonu gogorrak dudak sor litzake BBEren dinamikak izan lezakeen etorkizunaz: «Gaur egun dugun penaz eta lotsaz harago, afera honek zauri iraunkorrak utziko ditu» idatzi du Baionako EELVk.

Alfonsi eta Bove, Etxegarairen alde

Atzo arratsean bidali zuen prentsa agiria Baionako EELV taldeak. Handik kasik ordubetera, beste agiri batekin erantzun zuten Jose Bove eurodiputatu ohiak eta François Alfonsi eurodiputatuak. Biak ala biak EELVren babesarekin hautatuak izan ziren Europako Parlamenturako. BBEren erabakiari «traizio» egitea leporatu diete Baionako berdeei, eta azpimarratu ez dutela bat egiten Henri Etxetoren posizio politikoekin. Haien hitzetan, Etxegarai Euskal Herriko Laborantza Ganberaren aldeko borrokatik ezagutzen dute, eta harekin bat egiten dute hainbat engaiamendu «humanista eta federalistatan». Baionako auzapez eta Euskal Elkargoko lehendakari karguan berriz hautatua izatea espero dutela adierazi dute.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.