Parisko Auzitegiak bost urteko kartzela zigorra ezarri dio Mikel Barriosi, eta Frantzian egoteko debekua izanen du hamar urtez. Hurbilekoek jakinarazi dutenez, hilaren 29an sartuko da kartzelara. «Azken urteotan ez da horrelako kondenaziorik izan», salatu du Jokin Etxebarriak. Epaiketa gaur bertan izan da, eta, «erakunde kriminaleko» kide izatea leporatzen zion auzitegiak. Fiskaltzak sei urteko espetxe zigorra eskatu zuen. Defentsak, berriz, kargugabetzea. Xantiana Cachenaut abokatuak defentsaren eta fiskalaren galdeen «arteko alde handia» salatu du.
Gogora ekarri du 2011. urtearen ondotik egindako gertakariengatik epaitu dutela Barrios, hots, ETAk jardun armatua utzi zuenaz geroztik. Epaiketan, fiskaltzak zalantzan jarri du ETA desarmatu izana. Defentsak, aldiz, Euskal Herrian emaniko bake prozesua aipatu du.
Barrios 2017an atxilotu zuten Alemanian, Frantziak haren aurka ezarritako euroagindua medio. Osnyko (Frantzia) presondegian espetxeratu zuten, eta urtebetera aske utzi, zaintzapean.
Epaiketa gauzatu bitartean, Barriosen askatzea eskatzeko elkarretaratzea egin dute Itsasun (Lapurdi).
Barriosen askatasuna galdetzeko elkarretaratzea egiten ari dira, Itsasun. @berriapic.twitter.com/OAxNTtHoK2
— Oihana (@oi_tsr) June 23, 2020
