Erabakia jakin eta haserrea zabaldu da berehala gaur goizean Baionako auzitegiaren aurrean bildu direnen artean. Izan ere, zigor arina ezarri diote 2018ko abenduan Miarritzen (Lapurdi) Lola Villabriga ikasle gaztea aurpegian zauritu zuen poliziari: 90 egunez jarraian 15 euroko isuna ordaindu beharko du. Izan ere, poliziak bere burua hobenduntzat jo zuen prozedura hasieratik; eta berehala onartu du fiskalak proposatu dion zigorra —1.350 euroko isuna, orotara—. Defentsak auzi saio bat eskatu du hala ere: polizia indarkeria salatzeko baliatu du. Saio bukaeran, poliziak «damutzen» dela esan dio Villabrigari. Emakume gazteak baikortzat jo du «biktima gisa ezagutua izatea», eta «eztiturik» atera da auzitegitik. Gogora ekarri du Frantziako Poliziak zauritutako «hainbat eta hainbatek» ez dutela «auzitara jotzeko paradarik».
Edonola ere, Irailaren 17an bigarren auzi saioa izanen da kalte-ordainen inguruan. Sophie Bussiere abokatuak medikuntza gastuak eta kalte moralak estimatzeko txostena eskatuko du egun horretan.
90 egunez jarraian 15euroko isuna pagatu beharko du Lola Villabriga zauritu zuen poliziak. Irailaren 17an bigarren auzi saioa izanen da kalte ordainen inguruan. Manifestarien artean haserrea nagusi @berriapic.twitter.com/aPI6c8Uc6r
— Oihana (@oi_tsr) June 26, 2020
Defentsak «istripu» gisa kalifikatu du arte ikaslea zauritu izana. «Poliziak jasaten duen bortizkeria» ere ekarri du gogora, eta gaineratu du Polizia beharrezkoa dela gizartearen «segurtasuna bermatzeko». Poliziak zerbitzu aldaketa galdegin zuen bere kabuz, eta Bordeleko (Okzitania) beste unitate batean segitzen du lanean, Sud Ouest egunkariak jakinarazi duenez.
Poliziaren bortizkeriaren aurka lan egiten duen Desarmons Les taldeak lekukotasun morala eman du auzian, Poliziak erabiltzen dituen armen debekua eskatzeko. LBD jaurtigailuak gerra garaian erabiltzen direla salatu dute. Poliziek erabiltzen dituzten armek «askatasuna murrizten» dutela salatu du Bussierek, eta «manifestatzeko askatasuna arriskuan» jartzen dutela.
Villabriga zauritu izana G7arekin lotu du abokatuak: «Manifestariak beldurtzeko zauritu zuen Lola», salatu du, eta LBD40 jaurtigailuak debekatzeko eskatu du.
Kanpoan, bitartean, dozenaka pertsona bildu dira, biktimari sostengua adierazteko. Poliziak zauritu dituen pertsonen kolektiboko kideak zeuden tartean. «Lola» oihukatu dute, gaztea auzitegira sartu ondoren.
"Lola" oihukatu dute hainbat lagunek Lola Villabriga auzitegira sartu berri dela. @berriapic.twitter.com/BiR0QCMY7v
— Oihana (@oi_tsr) June 26, 2020
Frantziako Poliziak goizetik zaindu du auzitegia, eta hainbat lagun identifikatu ditu, elkarretaratzera zihoazela.
G7koen bilkuraren atarian
Frantziako Atzerri ministroa Baionara joan zen 2018ko abenduaren 19an, Miarritzen (Lapurdi) hurrengo udan egingo zuten G7koen goi bilera prestatzeko. Manifestari asko elkartu ziren hiriko kaleetan, bisitaren eta bilkuraren aurka, eta polizia batek aurpegira bota zion gomazko pilota bat gazteari. Haustura hirukoitza eragin zion. Iazko urtarrilean jarri zuen Villabrigak salaketa.
Poliziak irekitako txostenari jarraikiz, agentea «legeak ezarritako segurtasun betebeharrak ageriki jakinaren gainean hausteagatik» epaituko dute, eta «nahi gabe» lanerako hiru hilabete edo gutxiagorako ezgaitasun oso bat eragiteagatik. Poliziari urtebeteko espetxe zigorra eta 15.000 euroko isuna ezartzea espero zuen akusazioak.
