Iragarritakoa gertatu da: Poloniako presidentetzara aurkeztu diren hautagai bakar batek ere ez du lortu botoen erdiak baino gehiago eskuratzea, etak beraz, bigarren bozaldian erabakiko da nor izango den estatuburua. Bi hautagai izango dira lehian uztailaren 12an egingo den itzulian: egungo estatuburu eta PiS Legea eta Justizia alderdiko hautagai Andrzej Duda kontserbadorea eta Koalizio Zibikoko hautagai eta Varsoviako alkate Rafal Trzaskowski liberala.
Dudak botoen %41 inguru eskuratu ditu lehen itzulian, eta Trzaskowskik, %30,4. Legea eta Justizia alderdiko hautagaiak ia ziurra du eskuin muturraren babesa bigarren itzulirako. Ezkerreko alderdiek, berriz, Varsoviako alkatearen aldeko botoa eskatu dute.
Parte hartzea, berriz, %62 izan da, iazko legebiltzarreko hauteskundeen parekoa, eta 2015eko presidentetzarakoen lehen itzulian baino hamar puntu handiagoa.
Duda bera pozik agertu da lortutako emaitzekin, eta onartu du legealdiko azken hilabeteetan «erabaki zailak» hartu behar izan dituela.
