'Altsasu auzia'

Altsasuko gazteetako hiru hirugarren gradura aldatuko dituzte

Zaballako espetxeko funtzionarioek gaur jakinarazi diete gradu aldaketa Adur Ramirez de Aldari, Jokin Unamunori eta Oihan Arnanzi.

Altsasuko gazteen aldeko bilkura bat, duela bi urte Iruñean sanferminetan. /
Altsasuko gazteen aldeko bilkura bat, duela bi urte Iruñean sanferminetan. / Jagoba Manterola/Foku Tamaina handiagoan ikusi

Berria -

2020ko uztailak 2

Altsasuko gazteen gurasoek jakinarazi dutenez, Adur Ramirez de Alda, Jokin Unamuno eta Oihan Arnanz gazteak bihar hirugarren gradura pasatuko dira. Ondorioz, bihar bertan gradu horrek dauzkan onurak baliatu ahal izango dituzte. Hala jakinarazi diete Zaballako (Araba) espetxeko funtzionarioek gaur goizean. Urtarrilean sailkatu zituzten gazteetako bost bigarren graduan, eta horien artean zeuden orain hirugarren gradua eskuratu dutenak. Hiru horiek dira espetxean egun gehien daramaten Altsasuko gazteak.

Altsasuko auziko beste bi gazteei, Iñaki Abadi eta Aratz Urrizolari Eguberrien aurretik ezarri zieten bigarren gradua, eta ordutik eguna eta asteburuak espetxetik kanpo igarotzen dituzte. Horiek jaso zituzten, hain zuzen, espetxe zigorrik txikienak: hiru urte eta erdikoa Abadek eta lau urte eta bi hilabetekoa Urrizolak. Gainontzekoek zigor handiagoak jaso zituzten: Oihan Arranzek bederatzi urte eta erdi, Ramirez de Aldak eta Unamunok zortzi urte eta erdi, Julen Goikoetxeak eta Jon Ander Cobek zazpi urte eta erdi.

Hiru urte eta ia hamar hilabete pasatu dira gazteentzat eta haien familientzat amesgaiztoa hasi zenetik. 2016ko urriaren 15eko goizaldean Koxka tabernaren inguruetan izandako liskarrek bizitza betiko aldatu zieten. Terrorismo delitua egotzita, Auzitegi Nazionalak bere gain hartu zuen instrukzioa, eta urte hartako azaroaren 14an atxilotu zituen Altsasuko zortzi gazte. Hilabete baten buruan lau gazte aske utzi bazituen ere, ordutik preso daude Jokin Unamuno, Oihan Arnanz eta Adur Ramirez de Alda.

Iazko apirilean Auzitegi Nazionalean epaiketa egin zuten, eta ekainaren 1ean 79 urteko espetxe zigorra ezarri zieten, guztira, zortzi gazteei —bederatzi eta hamahiru urte arteko espetxe zigorrak—. Epai haren ondotik, espetxeratu egin zituzten Abad, Urrizola, Goikoetxea eta Cob. Martxoan, Auzitegi Nazionaleko apelazio aretoak berretsi egin zuen lehen epai hura; urrian, berriz, Auzitegi Gorenak espetxeratuei zigorra murriztu zien —hiru urte eta erdi eta bederatzi urte eta erdi artean—, ez baitzuen arrazoirik ikusi ideologiagatiko astungarriak ezartzeko.

Berria jakin eta gero, Nafarroako EH Bilduk nabarmendu du «albiste ona» dela baina ez dela «justizia eginen Altsasuko gazteak kalean izan arte».

ALTSASUKOAK

Oihan Arnanz
Zigorra. Bederatzi urte eta erdiko kartzela zigorra. Delituak: autoritate agenteen aurkako atentatua, nagusitasunez hiru lesio eragitea, desordena publikoa.

Jokin Unamuno eta Adur Ramirez de Alda
Zigorrak: Zortzi urte eta erdi bakoitzari. Delituak: autoritate agenteen aurkako atentatua eta nagusitasunez hiru lesio eragitea.

Jon Ander Cob eta Julen Goikoetxea
Zigorrak: Zazpi urte eta erdi bakoitzari. Delituak: autoritate agenteen aurkako atentatua eta nagusitasunez lesioak eragitea.

Aratz Urrizola
Zigorrak: Lau urte eta bi hilabete. Delituak: autoritate agenteen aurkako atentatua eta nagusitasunez lesio bat eragitea. Zigorraren laurdena betea du. Hirugarren gradua eman zioten abenduan.

Iñaki Abad
Zigorrak: Hiru urte eta erdi. Delituak: autoritate agenteen aurkako atentatua eta nagusitasunez lesio bat eragitea. Zigorraren laurdena betea du. Hirugarren gradua eman zioten abenduan.

Ainara Urkijo
Zigorrak: Urte eta erdi. Delitua: desordena publikoak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du oldarraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren akatsak berriz ere egin ez daitezen eta aurrera begira ikasteko

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta Galdakaoko tabernan uztailaren 27tik abuztuaren 4ra egon zirenek ere bai.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna