Ekain hasieran heldu zen sententzia: Iruña-Veleiako grafitoak faltsuak direla ondorioztatu zuen epaileak, eta bi urte eta hiru hilabeteko zigorra ezarri zion Eliseo Gil arkeologoari, iruzur egin eta ondarea hondatzeagatik. Euskararen Jatorria taldeko kideek, baina, salatu dute epaiketan erabilitako azterketek ez dutela «inolako berme zientifikorik», eta horregatik erabaki dutela hil amaieran gose grebari ekitea: «Analitika egin duen laborategia ez da inpartziala izan, euskalduntze berantiarra bultzatzen duen erakundearen adar bat delako; egin duen teknikariak ez du inoiz grafitoen dataziorik egin, hau da, ez du inolako eskarmenturik arlo horretan; erabili duen metodoa ez du inork erabili munduan orain arte; beraz, ez da fidagarria eta ez dago zientifikoki kontrastatuta; eta larriena: grafitoak faltsuak ez zirela zioen beste txostena (Antelo) ez dute aztertu epaiketan; horren egilea ez zen epaiketara joan, eta epaileak ez du kontuan hartu».
Legebiltzarkide berriek zientziaren bidea abian jartzea lortu nahi du plataformak gose grebaren bitartez. Bi eskakizun zehaztu dituzte: indusketa kontrolatuak egitea eta grafitoak datatzea. Erabakia jakinarazteko zabaldutako oharrean, gogora ekarri dute 150 lagunek baino gehiagok izenpetu dutela auzia argitzeko manifestua.
