Mendillorriko gazteei eginiko PCR proben %1,2k eman dute positibo

Nafarroako osasun agintarien arabera, «prebalentzia txikia» adierazten du datuak, eta Iruñeko auzoko agerraldia «atzera egiten hasi» dela ondorioztatu dute. Egun, mila biztanleko 153 PCR egiten dira Nafarroan, eta, ekaineko azken astetik, 38 agerraldi izan dira.

Mendillorri gazte batzuk, joan zen astean, azoaren «kriminalizazioa» salatzen, komunikabideen aurrean.
Mendillorri gazte batzuk, joan zen astean, azoaren «kriminalizazioa» salatzen, komunikabideen aurrean. Jagoba Manterola / Foku Tamaina handiagoan ikusi

Joxerra Senar -

2020ko uztailak 28

Santos Indurain Nafarroako Gobernuko Osasun kontseilariak jakinarazi duenez, iragan astean 1.145 gazteri PCR probak egin zizkieten, eta, aurretik, positibo emandakoen kontaktuen artean, beste 300 pertsona ingururi. «Agerraldia beherantz doa, baina oraindik itxaron egin behar dugu zer bilakaera duen ikusi arte», gaineratu du. Kasu guztiotatik 177k eman dute positibo, «soilik %1,2k». Nafarroako osasun agintarien arabera, «prebalentzia txikia» adierazten du datuak,

Navarra Sumak eskatuta, kontseilariak gaur goizean eman ditu Nafarroako Parlamentuan pandemiaren bilakaerari buruzko azken datuak. Haren esanetan, ekaineko azken astetik hona 38 agerraldi izan dira Nafarroan, eta guztira 504 pertsonari eragin diete. Kasu gehienetan, 26tan, hamar pertsona baino gutxiago kutsatu dira; beste bederatzi kasutan, hamar eta hogei artean, eta hiru kasutan, hogeitik gora.

33 agerraldi aktibo

Lehen kasua Sunbillan gertatu zen, baina lehen alarma Tuterako ezkontzak eragin zuen. Oraindik ere, «tantaka», 57 kasu azaleratu dira, horietatik 51 Nafarroan. Handik gutxira, uztailaren 6ko hamaiketakoaren kasua azaleratu zen, eta hark oraingoz 34 positibo eman ditu. Azkenik, uztailaren 11n Iruñeko Alde Zaharrean sortu eta Iruñerriko hainbat auzotan zabaldu den agerraldia dago. Mendillorrin eragin berezia izan duenez gero, auzoari bete-betean eragin dio, bigarren fasera itzuli baita. Oraingoz, 177 kasu atzeman dira. Halaber, 33 kasu «aktibo» daude oraindik ere.

Indurainen arabera, agerraldi asko, %29, gizartean gertatu dira, eta ondoren, sendian; baina, «azkenean, %46 agerraldi mistoak dira, arlo sozialean sortu, sendira iritsi eta batzuetan lanean ere eragiten dutenak». Kutsatu gehien agerraldi mistoetan gertatzen dira. Indurainek nabarmendu duenez, zahar etxeetan egoera kontrolpean dago, eta aurrea hartzeko neurriak zorroztu dituzte. Egoiliarren batek, zahar etxe batera sartu aurretik, positibo eman du. «Bi egoitzetan, erabiltzaile eta langile guztiei proba egin zaie, baina negatibo eman dute». Ukatu egin du agerraldi bat dagoela.

Indurainen arabera, azken astean positiboen %70 Iruñerrian izan dira, eta, batik bat,gazteei eragiten diete. «Kasuak kontrolatu eta kopuruak beherantz joan ahala, adin tarte horretako kasuen kopurua jaitsi egiten da», aipatu du. Udan joera hori behin eta berriro gertatuko dela uste du, baina onartu du agerraldiak izatea espero arren ez zutela uste hain azkar agertzea. «Kopuruagatik kezkatuta izan arren, ehuneko handi bati lotura epidemiologikoa aurkitzen diogu. Ikasturte amaieraren, normaltasun berrian sartu izanaren, babes neurriak leuntzearen, gizarte jarduera handitzearen, uda eta opor giroa sentitzearen ondorioak ikusten ari gara».

Egoera horri aurre egiteko, «giltzarritzat» jo du zaintza lana egitea, «positiboekin erlazionatutako kontaktuek lehenbailehen atzemateko asmoz». Aurretik aipatu bezala, Nafarroan oraintxe 38-40 lagun ari dira lanean, eta 96ra arte handitzeko tartea dute, «beharren arabera»; Indurainek nabarmendu lehen arretako erizain profesionalak direla, eta, prestakuntza berezia dutenez, profil hori hasieratik bereziki zaindu dutela, «kualitatiboki eredu hobea delako». Positibo bakoitzaren kontaktuak «egunean bertan» identifikatzen dira, eta biharamunean horiei PCR egiteko eskatzen zaie, Indurainen arabera. Maiatzaren 11tik uztailaren 25era arte, 8.376 kontaktu estu atzeman dira.

Minutuero PCR bat

Halaber, Nafarroako Ospitale Guneko mikrobiologia laborategiak egiten ditu PCR proba gehienak, baina beste baliabide batzuk erabiltzen dira. Dena den, Indurainek nabarmendu du hasiera-hasieratik sistema publikoaren alde egin dutela, mikrobiologia laborategia indartuz. Guztira, 99.718 PCR egin ditu Nafarroak gaur arte: biztanleko, 153 proba, batez beste. Azken egunetan, batez beste, 1.500 probatik gora egin dira, eta igandean hautsi zen marka: 1.948, egun bakarrean. «Nafarroan minutuero PCR proba bat egiten da»,

Egunotan, kanpaina bereziak egin dituzte: lehena Sunbillan, Berako lantoki batean, gero Tuteran eta azkena Mendillorrin. Halaber, udaleku batean eta Zarauzko Talai Mendin izan diren nafarrei proba egiteko baliabideak jarri zituzten. PCR proba horien guztien ondorioz, egun 3.000 lagun inguru daude bakartuta, berrogeialdia bete dezaten. «Elkartasuna adierazten ari dira, udan konfinatuta birusa zabaltzea eragozten dutelako».

Indurainek gizartearen inplikazioa eskatu du. «Hemen eta orain, guztiok dugu dena jokoan. Gizartearen lankidetza behar dugu erronka konplexu honetan. Ardura indibidual eta kolektiboa duen eta informazioa jasotzen duen gizarte baten inplikazioa behar dugu».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Jedea Bilboko metrotik irteten, maskara jantzita ©Luis Tejido/EFE

Berrehun positiboren langa gainditu da seigarren egunez jarraian Hego Euskal Herrian

Berria

Azken orduetan 224 kasu atzeman dituzte. Positiboetatik 123 Bizkaian detektatu dira.

Gasteizko zahar etxe bateko egoiliar bat bisita jasotzen. ©David Aguilar/EFE

Arabako eta Gipuzkoako zahar etxeetako hamar langilek positibo eman dute

Berria

Gainerako langileei eta egoiliarrei probak egin dizkiete, eta ez da kasu gehiago atzeman oraingoz.

Maskara jantzitako emakume bat Donostiako autobus geltokian, eskailera mekanikoak jaisten. ©Gorka Rubio / FOKU

Pandemiak desberdintasunak sakondu dituela dio Emakunderen txosten batek

Maddi Ane Txoperena Iribarren

Gizon eta emakumeen osasuna, ordaindu gabeko zaintza lanak, enplegua, indarkeria matxista, bazterkeria eta parte hartzea azken hilabeteotan nola aldatu diren aztertu du Emakundek. Egoera hobetzeko gomendioak egin dizkie erakundeei.

Emmanuel Macron Miarritzen (Lapurdi), artxiboko irudian. ©Bob Edme

Zaintza langileentzako sari bat hitzeman du Macronek

Oihana Teyseyre Koskarat

Adinekoez eta elbarrituez arduratzen diren zaintzaileek 1.000 euroko «COVID saria» jasoko dute. Frantziako Estatuak 80 milioi euroko diru laguntza emanen die departamenduei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna