Ostiralean egitekoa da Espainiako Erresumako autonomien presidenteen batzordea, eta osasun krisiaren eragin ekonomikoak eta sozialak aztertuko dituzte. Iñigo Urkullu Jaurlaritzako lehendakaria, ordea, ez da batzorde horretan izango. Madrilek ez du deitu oraindik ere kontzertu ekonomikoaren batzorde mistora, eta horrek EAJko buruzagiaren haserrea piztu du. Pedro Sanchez Espainiako presidenteak gutun baten bitartez adierazi dio Urkulluri bere eskaria ulertzen duela, baina «topaketa erabakigarri» horretan egotea «ezinbestekoa» dela.
Kontzertu ekonomikoaren batzordea martxoaren 11n bildu zen azken aldiz, eta Espainiako Gobernuak eta Eusko Jaurlaritzak konpromisoa hartu zuten, hain zuzen, urteko aurreneko seihilekoa amaitu baino lehen berriro batzartzeko, jeltzaleen esanetan. Behin epe hori igarota, Jaurlaritzak «berehala» deitu zezala eskatu zion Madrili, lehengo astean. Baina Aitor Estebanek asteon adierazi duenez, azken egunetan ez da bi aldeen arteko kontakturik egon horretarako.
