Espetxe Zuzendaritzako Idazkaritza Nagusiak jakinarazi duenez, Zigor Blanco euskal presoa Coruñako Teixeiro espetxetik Asturiasko Villabona kartzelara hurbilduko dute, hartara «bere lotura familiarretatik gertu» egongo delako. Izan ere, orain arte etxetik 600 kilometrora zegoen, baina aurrerantzean 250 kilometro ingurura egongo da.
Blanco 2003. urtean espetxeratu zuten. Hogei urteko kartzela zigorra ezarri zioten, 2001ean Portugaleten (Bizkaia) ETAko zenbait kiderekin batera Ertzaintzaren patruila baten kontra molotov koktelekin egindako eraso batean parte hartzea egotzita.
PSOE Espainiako Gobernuan dagoenetik —2018ko ekaina—, 40 euskal preso hurbildu dituzte, eta hamabi Euskal Herriratu.
