Geroa Bai koalizioko zenbait independentek iragarri dute koalizio barruan beste alderdi bat sortzeko prozesua abiarazi dutela, eta urrian amaituko dela alderdi berriaren sorrera. Erakunde politiko berriaren izena Geroa Nafarroako Sozialberdeak Europan izango da, eta jite «sozialberdea» izango du.
Alderdi berriaren oinarri politikoak hauek izango dira: jasangarritasuna, norabide progresista eta sozialberdea, «Nafarroa subjektu politiko gisa» hartzea, tokian tokiko politika erdigunean jartzea eta Europa «estatuen gaineko erreferentzia politiko gisa» hartzea.
Geroa Bai koalizioko hamazazpi kidek bultzatzen dute egitasmo berria. Horien artean daude Nafarroako Gobernuko zenbait kide: esaterako, Jose Maria Aierdi bigarren lehendakariordea, Itziar Gomez Ingurumen kontseilaria eta Ana Ollo Herritarrekiko Harremanetako kontseilaria. Uxue Barkos lehendakari ohi eta parlamentariak, Koldo Martinez senatariak, Pablo Azkona Lodosako alkateak eta beste zenbait hautetsik eta kidek sustatu dute egitasmoa.
Abuztuan eta irailean, alderdia eratzeko prozesuari ekingo diote, eta aukera emango diete herritarrei alderdi berrian izena emateko. Urrian, berriz, prozesua bukatuko dute, eta zuzendaritzako kideak hautatuko dituzte.
