Zahar etxeetako egoiliarren senitartekoek azalpenak eskatu dizkiete Arabako, Bizkaiko eta Gipuzkoako ahaldun nagusiei, zerbitzu horietan gertatzen ari dena argitzeko. Haien arabera, egoitzetan dagoen egoera «larria» da, eta ahaldun nagusiek badute horretan ardura. «Ulertezina iruditzen zaigu egoitzak kutsatzeko guneak izaten jarraitzea sei hilabete baino gehiagoko pandemiaren ondoren». Senideek uste dute orain arte eginiko prebentzioko, detekzio goiztiarreko eta ikuskapeneko protokoloek ez dutela funtzionatzen edo ez direla martxan jarri. Esate baterako, adierazi dute pertsonen arteko babes neurriak eta zentroei eskainitako baliabideak ez direla nahikoak.
Babestu eta Irauli, erabiltzaileen senitartekoen elkarteek egin dute eskaria, eta baita Arabako, Bizkaiko eta Gipuzkoako pentsiodunen mugimenduak ere. Haien ustez, beharrezkoa da ahaldun nagusiekin batera kontratatzea egoitzak «zentro seguruak» izateko aurreikusi diren jarduketa planak, eta horri buruz duten iritzia azaldu ahal izatea.
