Samuel L. Jackson aktorea izenez ezagutzen ez duenak gogoratuko du, ziurrenera, Quentin Tarantinoren Pulp Fiction filmean predikatzaileen moduan Bibliaren aipamen luzeen ondoren droga trafikoan lehia egiten ausartzen zirenak tiroka errukirik gabe hiltzen zituen pertsonaia trajedun hura, edo zuzendari beraren Django Unchained filmeko zuri esklabozaleen zerbitzari leial hura. AEBetako politikagintzan engaiatua da aktorea, eta bideo bat grabatu du herritarrak datozen hauteskundeetan botoa ematera bultzatzeko. Bideoan 15 hizkuntzatan irakasten du norbait pikutara bidaltzen, eta mezu horietako lehena euskarazkoa da: «Zoaz popatik hartzera (euskara)» zeinua erakusten dio aktoreak kamerari, eta euskaraz botatzen du mezua. Gero, beste hizkuntzatan, katalana tartean. Aktorearen Twitterreko kontuak 8,5 milioi jarraitzaile ditu.
You guys showed up and blasted through our Voter Action Goal for #GoodToVote! So as promised, here's some Cussin' 15 ways to go! Thanks for getting involved and make sure to #vote on Nov.3rd! #votemask@faircount@fairfight#MKsaysVote#yourvoicematterspic.twitter.com/6GkHudrm53
— Samuel L. Jackson (@SamuelLJackson) September 15, 2020
Aurreko txio batean erronka bota zien aktoreak jarraitzaileei: lortzen bazuen 2.500 jarraitzailek botoa emateko izena ematea, edo botoa eman ahalko dutela ziurtatzea, erakutsiko zien biraoka aritzen 15 hizkuntzatan. Gaurko bideoa haren jarraipena da, jarraitzaileak mobilizatzea lortu zuelako.
Listen up - If 2500 of you click a voting action below to make sure you’re #GoodToVote, I will teach you to swear in 15 different languages. Go to https://t.co/nVk8WzUm8N now! pic.twitter.com/g4eUmHwuP9
— Samuel L. Jackson (@SamuelLJackson) September 14, 2020
Samuel Leroy Jackson aktorea eta ekoizlea da. 150 film baino gehiagotan egin du lan, hala nola Goodfellas (1990), Jungle Fever (1991), Jurassic Park (1993), Pulp Fiction (1994), Jackie Brown (1997), Django Unchained (2012), eta The Hateful Eight (2015).
Gaztetatik eduki du kontzientzia politikoa. 1968. urtean Martin Luther King hil ondoren, beltzen eskubideen aldeko borrokalariaren hiletan parte hartu zuen Jacksonek, antolakuntzan. Hurrengo urtean, Atlantako Morehouse Fakultateko zuzendaritza bahituta eduki zuen, beste ikaslerekin batera, unibertsitateko curriculumean aldaketak eskatzeko. Aldaketak egin zituzten, baina Jackson gaztea bi urtez bidali zuten etxera ekintzaren ondoren. Black Power mugimenduan ibili zen orduan. Baina FBIk mehatxu egin zion, eta amak Los Angelesera bidali zuen.
2008. urtean, Barack Obamaren alde egin zuen kanpaina, Alderdi Demokrataren primarioetan.
