Bizkaiko Bertsozale Elkarteak gaur jakinarazi du ez dela aurten Bizkaiko txapelketa jokatuko. «Zalantza eta bilera askoren ostean, COVID-19ak eragindako egoera tarteko, Bizkaiko Bertsozale Elkartean Bizkaiko Bertsolari Txapelketa atzeratzea erabaki dugu, printzipioz, datorren urtera». Udaberrian jokatu beharreko sailkapen fasea azken hamar egunetan jokatu dute, baina txapelketak ez du aurrera egingo.
«Txapelketak parte hartzaileengan duen eragina handia da; euren ikusgarritasuna plaza honek ematen du eta hurrengo urteetarako plazak eskaintzen dizkie. Urte berezia da, eta zaila da aukera berdintasuna bermatzea egoera honetan. Batetik, saioen ezaugarriak pandemiaren bilakaeraren arabera aldatu daitezke eta, bestetik, sailkapen izaera duenez, saio batean parte hartu ahal ez izateak Txapelketa osoa galtzea eragingo luke», azaldu du elkarteak.
Dena den, «txapelketako saioak egiteko baldintzarik egon ez arren», Bizkaiko Bertsozale Elkarteak uste du bestelako saio asko antola daitezkeela guztion osasuna bermatuz. «Kultura segurua dela berretsi nahi dugu, eta guztiok seguru egonda egiteko moduko saioak antolatu daitezkeela uste dugu. Horregatik, udazken honetarako bertso saioen zirkuitutxo bat antolatzen ari gara. Kulturak merezi duelako, eta bertsozaleek ere bai». Aurrerago emango dituzte saio horien gaineko xehetasunak.