AEM Amnistiaren Aldeko eta Errepresioaren Aurkako Mugimenduak jakinarazi du Puerto Real erietxera (Andaluzia) eraman dutela Iñaki Bilbao Goikoetxea euskal presoa. Puerto III espetxean daukate preso Bilbao, eta gose greba mugagabeari irailaren 9an ekin zion, AEMk azaldu duenez.
AEMk jakinarazi duenez, harekin batera preso den Dani Pastor presoak eman du erietxeratzearen berri. Hark azaldu zuen atzo 19:00etan eraman zutela anbulantzian Bilbao, Espainiako Auzitegi Nazionalaren aginduz: hura ospitaleratzea eta «bizirik mantentzeko egin behar den guztia» egitea agindu du auzitegiak, AEMren arabera.
