Kataluniako erreferenduma egin zenetik hiru urte bete dira gaur, eta EAJk eta EH Bilduk data baliatu dute Quim Torra Kataluniako presidentearen inhabilitazioa salatzeko Eusko Legebiltzarrean. Bi taldeek adierazpen bat adostu dute Torraren inhabilitazioa arbuiatzeko, eta Joseba Egibar eta Maddalen Iriarte bi taldeetako bozeramaileek eman dute haren berri legebiltzarreko prentsa aretoan. Hiru atal ditu agiriak. Lehen puntuak honela dio: «Arbuioa eta alarma adierazten dugu Quim Torra Generalitateko Presidentearen inhabilitazioa dela eta, Kataluniako autogobernuaren aurkako eraso larria izatez gain, herriaren borondatearen deslegitimazio ariketa bat delako».
Bigarren puntuan, talde sinatzaileek Espainiako botereei eskatu diete bertan behera utz dezatela «zilegi diren aldarrikapen politikoak judizializatzeko estrategia», eta errespeta ditzatela oinarrizko eskubideak, funtsezko askatasunak eta eskubide kolektiboak, «horiek guztiak demokraziaren oinarri» direlako. Azkenik, dei egin dute Kataluniako herriaren «borondate demokratikoaren adierazpena» ahalbidetzera eta haren erabakia errespetatzera.