Iñaki Bilbao Beaskoetxea euskal preso lemoarra (Bizkaia) libratu dute arratsaldean Valdemoroko (Espainia) espetxetik. Zazpi urte iragan zituen Frantziako kartzeletan, 1992an atxilotu zutenetik 1999ra. Gero, Espainiaratu egin zuten, eta 21 urtez egon da preso Espainiako Estatuan.
Urte honetako irailean epaitu zuten Bilbao Beaskoetxea azken aldiz, Auzitegi Nazionalean, 1983an ETAk Guardia Zibilaren kontra egindako ekintza baten harira. Auziaren ondotik, Castelloko espetxetik Valdemorokora aldatu zuten euskal presoa. Auzitegiak ez du oraindik eman epaiaren berri, baina, anartean, kartzelatik atera dute. Fiskalak 75 urteko kondena eskatu zuen, baina abokatuak argudiatu zuen dagoeneko 28 urtez egon dela preso, eta berehala aske uzteko eskatu zuen.
