EAJk eta EH Bilduk ez dituzte Voxen ekinbideak eztabaidatuko aurrerantzean

EAJk eta EH Bilduk iragarri dute ez dutela eztabaidatuko Voxeko legebiltzarkideak Eusko Legebiltzarrean aurkezten duen ekinbiderik. Bi alderdiok adierazi dute ez dutela asmorik alderdi ultraeskuindarrarekin liskarretan hasteko, eta aurrerantzean «bizitza politikoa garrazten duten eztabaida politikoetan parte hartzeari uko» egingo diotela esan dute. Asmo horrekin bat egin dute Elkarrekin Podemosek eta PSE-EEk, baina ñabardura batekin: Voxen proposamen bakoitzaren edukiaren arabera erabakiko dute hitza hartu ala ez. Gaur, Voxen lehen lege proposamena eztabaidatu dute osoko bilkuran, eta PP-C's-ek baino ez du parte hartu eztabaidan.