Lau egun behar izan dituzte estatubatuarrek presidentetzan nor egongo den jakiteko, asteazkenetik larunbatera. Bertatik bertara bizi izan du Arantxa Elizegi Egilegor BERRIAko berriemaile bereziak. Miamin egon da kanpaina, hauteskunde eguna eta boto zenbaketa jarraitzen.
Luzea izan da astea, eta tentsioz betea: protestak, boto kontaketa amaigabeak, iruzur salaketak eta abar. Larunbat gauean, ordea, ospakizunak izan ziren nagusi. Joe Bidenek garaipena eskuratu zuen, eta emakumezko bat, migratzaileen alaba, izango da presidenteorde, Kamala Harris.
Orain, ikusteko dago norentzat diren Ordezkarien Ganberako eta Senatuko gehiengoak. Eta, batez ere, zer egingo duen Donald Trump presidenteak: porrota onartu eta amore eman, edo iragarri moduan auzitara jo.
