Arnaldo Otegi EH Bilduko koordinatzaileak berretsi egin du Mertxe Aizpurua EH Bilduko Kongresuko diputatuak esandakoa: Espainiako Gobernuko negoziazio taldearekin harreman joria dute, jarrera "proaktiboa" dago, eta EH Bilduk mahai gainean jarritako gaiak begi onez hartu dituzte. Horrenbestez, azken orduko aldaketarik ez bada, Espainiako Aurrekontuen Legea babestuko duela esan du Otegik, Radio Euskadin egindako elkarrizketa batean.
Berretsi du Kongresuan alderdi guztiekin dituztela elkarrizketak, eta gobernua osatzen duten alderdiekin harreman oparoa dutela. Lehentasuna "pertsonen eskubideak blindatzea" dela esan du, eta bide horretan EH Bilduk egindako proposamenak abegikor hartu dituztela sumatu dute. Horrenbestez, akordioa itxita ez badago ere, bozketa egunera bitartean gauzak okertzen ez badira, EH Bilduk baiezkoa emango die aurrekontuei.
Pablo Iglesias Espainiako Gobernuko presidenteorde bigarren eta Podemoseko buruak txio bidez erantzun dio berehala Otegiri. Albistea ona dela esan du: "Ezkerreko politiketan aurrera egiteko ardura eta konpromisoa erakusten dute. Inbestiduraren blokea indartu egiten da, eta izango da legealdikoa, eta estatuaren norabidea zedarrituko duena".
