Georgiako Ametsa alderdia dago egun agintean herrialdean, eta jarraituko duela ematen du, legebiltzarrean erabateko gehiengoa lortu duelako, gaur zabalduriko emaitzen arabera. Oposizioak hauteskundeen bigarren itzuliari boikot egitera deitu zituen herritarrak, gobernuko alderdiak lehenengoan iruzurra egin zuela argudiatuta.
Georgi Gakharia lehen ministroaren alderdiak 90 eserleku lortu ditu legebiltzarrean, eta gehiengoa edukitzeko nahikoa dira 76. Oposizioak 60 ordezkari baino ez ditu edukiko, zortzi alderdiren artean banatuta. Mikhail Saakashvili presidente ohiaren alderdiak 36 aulki baino ez ditu izango, baina, oposizioko beste alderdiek bezala, iragarri du ez duela parte hartuko legebiltzarreko jardunean.
Oposizioak ez bozkatzeko eskatu zuen; atzoko hauteskundeetan, 562.664 herritar joan ziren bozkatzera, eskubidea zutenen %26,29, alegia.
Hauteskunde prozesuak zaintzen dituzten nazioarteko erakunde gehienek esan dute bozak garbiak izan direla.
Oposizioaren jarraitzaileek protestak egin zituzten legebiltzarraren aurrean, eta Hauteskunde Batzordearen egoitzan sartzen saiatu ziren. Asteazkenean berriz atera ziren kalera, Mike Pompeo AEBetako atzerri politikako buruak Tbilisi hiriburura eginiko bisitaren harira. Europako Batasuna eta AEB artekari lanetan ibili dira.
