Ostegun eguerdi honetan aske gelditu da Oier Oa euskal preso ohia. Atzo arratsaldean atxilotu zuen Frantziako Poliziak, Larresoro(Lapurdi) eta Baiona artean, Bernat Etxepare lizeora lanera zihoala, eta handik Hazparneko komisarira eraman zuten. Frantzian baimenik gabe sartzea eta Fijait arau hauste terroristen egileen Frantziako fitxategi judizial automatizatuaren neurriak ez errespetatu izana leporatu diote Amaia Rekarte haren abokatuaren hitzetan. Heldu den martxoaren 23rako eman diote justiziaren aurrera agertzeko deialdia.
2012ko otsailaren 24an atxilotu zuen Oa Frantziako Poliziak Angelun (Lapurdi), eta lau urteko espetxe zigorra beteta, 2015eko uztailean aske geratu zen. Frantziako lurraldean bizitzeko debekua eman zioten orduan. Rekarteren hitzetan, debeku horri helegitea ezartzeko bidea jorratuko dute.