Aske geratu da Asier Ormazabal euskal presoa. Frantziako Poliziak duela 23 urte atxilotu zuen hernaniarra, ETAko kide izateagatik; orain, amaitu ditu ezarri zizkioten espetxe zigorrak, eta etxera bidean da, Etxerat-ek jakinarazi duenez. Teruelen (Espainia) zegoen espetxeratuta; han igaro ditu azken bederatzi urteak, eta bera zen espetxe hartan geratzen zen euskal preso bakarra.
Kartzelaldiko lehen bost urteak Frantzian igaro zituen Ormazabalek, eta, Espainiaratua izan ostean, hemezortzi egin ditu hango espetxeetan, azken bederatziak Teruelen. Aurretik, Pontevedran (Galizia) eta Asturiaseko Villabonan egon zen preso.