Frantziako Aldizkari Ofizialean argitaratu dute informazioa, dekretu bidez: Philippe Le Moing-Surzur izendatu dute Baionako suprefetaren kargurako. Hala, Frantziako Estatuaren ordezkaria izanen da Ipar Euskal Herrian. 2018tik karguan zen Herve Jonathan ordezkatuko du; baina ez dute oraino zehaztu noiz hartuko duen kargua Le Moing-Surzurek.
Frantziako Administrazio Eskolako ikasle izandakoa da Le Moing-Surzur, eta Frantziako goi funtzionario aritu da azken urteetan. Frantziako Barne Ministerioan aritu da 2006tik, besteak beste. 2013tik, zehazkiago, Herritarren Segurtasunerako eta Krisien Kudeaketarako Zuzendaritzako zuzendariorde izan da. Bestalde, jadanik izanak ditu prefeturako karguak Sarthen (Loirerria), Loir-et-Cheren (Erdialdea) eta Reunion uhartean. Laborantza ingeniaria ere bada, Esitpa eskolan lorturik titulua.
Herve Jonathan Baionako suprefet ohiak Wallis eta Futunan hartuko du kargu berria, prefet gisa, Frantziako Estatuaren zerbitzuek azaroan jakinarazi zutenez.
