EH Bilduk eta PSE-EEk Eibarko Udalaren aurrekontuak aurrera ateratzeko akordioa lortu dute. Koalizio subiranistak ohar baten bidez jakinarazi duenez, datorren urtarrilaren 15ean egitekoa den udalbatzan abstenitu egingo da. PSE-EEk bederatzi zinegotzi ditu; EAJk, sei; EH Bilduk, bost, eta Ahal Dugu-k, bat. Miguel de los Toyos PSE-EEkoa da alkatea.
Koalizio subiranistaren arabera, «neurri sozialak» indartuko dituzte lortutako aurrekontu itunari esker. Azken hilabeteotan beste kasu batzuetan ere ados jarri izan dira bi indar politikoak. Esaterako, bai Espainiako Gobernuaren aurrekontuak eta bai Nafarroako Gobernuarenak onartzeko orduan, eta, udalerrietan, Irungoan.