URRIAREN 12A

Otsailaren 9tik 12ra deklaratuko dute Nafarroako hamabi gazteek

Urtarrilaren 12tik 14ra deklaratu behar zuten Espainiako Auzitegi Nazionalean, baina elurteagatik gibelatu zituzten deklarazioak. Nafarroako Auzitegi Nagusitik deklaratuko dute, telematikoki, Espainiako koroaren aurkako delitu batengatik. «Kontrol sozial ikaragarria» salatu dute, urriaren 12ko ekintzan ez baitzituzten identifikatu ere egin.

Joan den urriaren 12an Iruñean egindako ekitaldia. IDOIA ZABALETA / FOKU
maddi ane txoperena iribarren
2021eko otsailaren 3a
17:28
Entzun

Otsailaren 9an, 10ean eta 12an deklaratuko dute joan den urriaren 12an Kolonen estatua bat eta Felipe VI.a Espainiako erregearen bertze bat eraistea leporatzen dieten hamabi gazteek. Espainiako Auzitegi Nazionalak hartuko die deklarazioa, baina Iruñetik eginen dute, Nafarroako Auzitegi Nagusitik, telematikoki. Urtarrilaren 12an deklaratu behar zuten hasieran, baina Madrilgo elurtearen ondorioz gibelatu egin zituzten deklarazioak, eta ikerturiko gazteek gaur jakinarazi dute deklarazioaren data berria.

Bertze «afera» bat salatzeko ere baliatu dute oharra gazteek, nolanahi ere: «jasaten» duten «kontrol sozial ikaragarria» gaitzetsi dute, batez ere «gai sozial eta politikoetan inplikatuta» dauden hainbat gaztek pairatzen dutena. Izan ere, ohartarazi dute polizia etxera deitu zituztela deklaratzera, baina urriaren 12an ez zietela identifikatzeko eskatu, ez jakinarazpenik eman ere: «Inoiz atxilotuta edo komisarian egon ez garen gazteak izanik, nola liteke egoera hori?».

Gaineratu dutenez, urriaren 12ko ekintzan parte hartu ez zuten pertsona batzuk ere deitu zituzten hasieran polizia etxera deklaratzera, eta horietako bat ikertua da oraindik ere, nahiz eta ez zuen leporatzen dieten ekintzan parte hartu.

Deklaratuko duten lehen egunean elkarretaratzera deitu dute gazteek, adierazpen askatasunaren alde, hainbat sindikatu, eragile eta alderdi politikoren babesarekin. Nafarroako Auzitegi Nagusiaren aitzinean elkartuko dira, 10:00etan.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.