memoria

Ategorrietako 1931ko sarraskiaren biktimak oroitzeko eskatu du EH Bilduk

Guardia Zibilak zazpi langile hil zituen tiroz Donostian. 90 urte beteko dira maiatzaren 27an, eta indar subiranistak nabarmendu du hirian ez dagoela gertakariari buruzko oroigarririk.

Maiatzaren Leheneko manifestazioa Donostian, 1931n. 26 egun geroago gertatu zen sarraskia Ategorrietan.
jon olano
2021eko apirilaren 14a
16:39
Entzun

EH Bilduk Donostiako Udalari eskatu dio Ategorrietako sarraskiaren biktimen errekonozimendu instituzionala sustatu eta adostu dezala sindikatuekin eta gainerako eragileekin. Markel Ormazabal eta Reyes Carrere EH Bilduren udal taldeko zinegotziek gogorarazi dutenez, «Donostian izan den langileen sarraski larrienak» ez du «inongo oroigarririk» hirian: «Ez dago bere memoriaren inongo aztarna ofizialik, eta Donostiako hiritar gehienek ez dute ideiarik ere gertakari horren inguruan».

Maiatzaren 27an 90 urte beteko dira Ategorrietan Guardia Zibilak zazpi langile tiroz hil zituenetik. Jose Carnes, Manuel Perez, Jose Novo Martinez, Antonio Barro, Julian Zurro Perez, Jesus Camprosola eta Manuel Lopez Diaz izan ziren hildakoak. Egun horretarako greba orokorrera deitu zituzten Pasaiako arrantzaleak, eta 4.000 pertsona inguru elkartu zituen manifestazio bat abiatu zen Trintxerpetik Donostiarantz.

Hilabete eskas zen errepublika indarrean zela, eta hainbat sektorek errepublikaren aurkako erasotzat hartu zuten deialdi hura. Ramon Aldasoro Gipuzkoako gobernadore zibilak ez zuen baimendu, eta, Mirakruz gaina igaro ondoren, Guardia Zibilak tiroka erantzun zien manifestariei. Zazpi hildakoez gain, dozenaka lagun zauritu zituzten.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.