Albistea entzun

Iruñeko atxiloketak

GKSren «kale borrokako taldea» osatzea leporatu die Poliziak Iruñean atxilotuei

Arrotxapean eta Burlatan atxilotutako gazteek «GKSren inguruko kale borrokako talde bat» osatzen zutela zabaldu du Espainiako Poliziak ohar batean. Indar Gorri ere nahastu du salaketan.

Espainiako Poliziak, apirilaren 29an. Atxilotuek telematikoki delaratu zuten.
Espainiako Poliziak, apirilaren 29an. Atxilotuek telematikoki delaratu zuten. JAGOBA MANTEROLA / FOKU Tamaina handiagoan ikusi

Berria -

2021eko maiatzak 3

Espainiako Poliziak adierazi du urtebetez aritu dela atxilotuak ikertzen. «Ekintza bortitzak, sabotajeak eta erasoak egiten zituzten, modu antolatu eta koordinatuan», Poliziak berak gaur zabaldutako oharraren arabera. Bost bankuren egoitzen eta bi dendaren aurkako erasoak sartu dituzte salaketa horien artean, eta zaborrontziak kalean gurutzatzea eta poliziei harrika egitea ere egotzi diete. Atxilotutakoak «erakunde sezesionista erradikaletako» kide direla zehaztu du Poliziak, eta GKS Gazte Koordinadora Sozialista aipatu du zehazki. «Amnistia Ta Askatasuna» taldearen zale direla ere aipatu dute oharrean.

Apirilaren 27an atxilotu zituzten hamar lagun Iruñerrian, eta epailearen aurrean deklaratu ostean aske utzi zituzten, apirilaren 29an, haiek eta Poliziak deklaratzera deitutako beste bi. Espainiako Poliziak egin zituen atxiloketak, eta astebete geroago eman du atxiloketen arrazoiaren bere bertsioa. Oharrak, hitzez hitz, hau dio: «[Taldearen jardun bortitza] Lotuta legoke haren kideek erakunde politiko seziosionista erradikaletan duten militantziarekin, zehazki Gazte Koordinadora Sozialistaren (GKS) inguruarekin, zeina ezker abertzaleko sektore disidente erradikalenean kokatzen den gazte erakunde bat baita, eta Amnistia Ta Askatasunaren (ATA) kausarekin bat egiten duena».

Polemika piztu zen atxilotu zituztenean, jakin zelako Poliziaren txostenak ETAren zatiketa baten ondorengo talde batekoak izatea egozten ziela atxilotuei. Arrazoi horietan sakondu du Poliziak gaurko oharrean, nahiz eta epaileak ETAri buruzko aipamenik ez zuen egin atxilotuei deklarazioa hartu osteko agirian —auzia sekretupean dauka epaileak—. Poliziak berriro argudiatu du atxilotuek «talde kriminal bat» osatzen zutela, nahiz eta defentsako abokatuek joan den astean ere azaldu zuten akusazio zehatzak «kontu txikiak» direla halako delitu larria leporatzeko.

Iazko azaroko istiluak

Zehazki, 2020ko azaroaren 7an Arrotxapea auzoan gertaturiko istiluak antolatzea leporatzen die Poliziak atxilotuei. GKSk alde zaharrean egindako manifestazio baten ondoren piztu ziren, eta Poliziak bi gertakariak lotu ditu. Adierazi dute gazteei GKSko materiala aurkitu dietela atxiloketen ondorengo miaketetan. Atxilotutako batzuen etxean lehergaiak egiteko eskuliburuak aurkitu dituztela ere esan du Poliziak ohar horretan, eta borrokarako ukabil bat eta bost etxafuego.

Poliziak kasu bat aipatu du salaketan, azaroaren 7ko istilu horietan banku batera babes bila sartu zen familia batena. «Izu handia» pasatu zuten senar-emazteek eta haien lau seme-alabek, eta umeetako bat traumatizatuta geratu da, Poliziaren esanetan, ez baitu leku hartatik pasatu nahi.

Poliziaren esanetan, atxilotutako horietako lauk osatzen dute taldearen muina, eta haien gertukoak dira beste akusatuak. Bortizkeria bizi estilo gisa beretu dutela dio Poliziaren oharrak, umetatik elkarrekin duten adiskidetasunak «kohesioa» eman diola taldeari, eta haietako batzuk Indar Gorri taldeko kideak direla. Poliziaren oharraren argudiaketa saio bat da frogatzeko «talde kriminal antolatu bat» osatzen zutela gazteek, eta denboran jarraitua izan dela talde hori eta jokabide hori.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©EUSKALTZAINDIA / BERRIA

Pentsalari poliedrikoa

Igor Susaeta

Federiko Krutwigen jaiotzaren mendeurrena da gaur. Erreferentziazko intelektuala izan zen, eta haren ibili oparoko lan garrantzitsuenetako bi dira Euskaltzaindia berritzeko proposamena 1949an, eta ETAren V. Biltzarreko txostenak.

Justizia errestauratiboaren alde egin du Artolazabalek

Berria

Biktimek eta espetxe ereduak ez dutela zertan antagonikoak izan adierazi du Eusko Legebiltzarrean
Hamaika Gara kanpainaren agerraldia atzo Bilbon. ©MARISOL RAMIREZ/FOKU

Mobilizaziora deitu du Gure Eskuk, Bilbon

Maialen Arteaga

Uztailaren 3an egingo da, eta erabakitzeko eskubidearen aldeko ekintza «politiko eta kulturala»izango da. Hamaika Gara sinadura bilketatik abiatuta, beste egitasmo batzuk hasiko dira gaur zortzi

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna