Albistea entzun

Garraioa

Gipuzkoako Aldundiak bidesarien beste arau bat egingo du, hirugarrena

Auzitegi Gorenak ez du onartu baliogabetutako bigarren arauaren aurka jarritako helegitea. Garraiolariek eskatu dute itzul diezaietela dirua.

N-1 autobiako bidesaria, Andoainen.
N-1 autobiako bidesaria, Andoainen. Jon Urbe / Foku Tamaina handiagoan ikusi

Iker Aranburu -

2021eko maiatzak 13 09:19

Epaitegietan porrot bat bestearen atzetik pilatu arren, Gipuzkoako Aldundiak ez du atzera egin N-1 errepidean eta A-15 autobidean ibilgailu astunei ordainsaria ezartzeko asmoetan. Aintzane Oiarbide Bide Azpiegituretako diputatuak iragarri du beste arau bat onartuko duela «datozen egunotan», hirugarrena, eta horren bitartez ordainsariak ordaintzen jarraitu beharko dutela lurraldeko bi bide nagusiak erabiltzen dituzten kamioiek. Horrela erantzun dio aldundiak bigarren araua behin betiko hondoratu dion epaiari.

Izan ere, Espainiako Auzitegi Gorenak ez du tramiterako onartu Gipuzkoako Batzar Nagusiek bigarren araua baliogabetu zuen epaiaren aurkako kasazio helegitea. Gorenak «forma akatsak» argudiatu ditu helegitea ez onartzeko, Fenasdimer garraiolarien Espainiako patronalak jakinarazi duenez.

Fenasdimerrek garaipen gisa hartu du epaia, uste baitu «legez kanpoko ordainsari baztertzaileak behin betiko geratu» direla. Azken hiru urteetan ordaindutako bidesariak berreskuratzeko deia egin die patronalak garraiolariei. Hamabost milioi euro izango lirateke, Fenasdimerren kalkuluen arabera.

2016an jarri zen indarrean lehen araua, baina EAEko Justizia Auzitegiak legez kanpokotzat jo zuen, atzerriko kamioilariak baztertzen zituelakoan. Auzitegi Gorenak epai hori berretsi zuen martxoan. Hura ordezkatzeko, beste arau bat onartu zuten Gipuzkoako Batzar Nagusiek, bigarrena, aldaketa batzuek eginez tarifetan, kanpoko kamioilariek batez ere erabiltzen dituzten errepide zatiak gehiago ez zigortzeko. Bigarren arau hori, ordea, legez kanpokoa zela ebatzi zuen EAEko Justizia Auzitegiak, 2020ko maiatzean. Horren aurkako helegitea da orain onartu ez dutena.

«Erabaki irmoa»

Bereari eutsita erantzun dio Gipuzkoako Foru Aldundiak Gorenean jasotako kolpeari. «Ibilgailu astunei errepide horiek erabiltzeagatik kobratzen jarraitzeko erabaki irmoa hartu du, Europako zuzentarauak ezartzen duen bezala». Hori dela eta, hurrengo egunetan onartuko du bidesariak berehala berrezarriko dituen dekretu bat, eta, aldi berean, foru-arau berri bat prestatzen jarraituko du, Batzar Nagusietan onartzeko.

«Gipuzkoarren interes orokorraren alde egiten jarraitzen dugu, Batzar Nagusietan onartutako arauen bidez, bertan baitago Gipuzkoako subiranotasuna eta Europako premisa, alegia, bidesaria dela sistema sozial ekologikoki aurreratuena, eta, horregatik, beharrezkoak diren urratsak egingo ditugu», azpimarratu du Oiarbidek.

Babes bila, Europara

Baina Markel Olanoren gobernuak ez du amore eman epaitegiekin duen gatazkan, eta iragarri du Europako Batzordera joko duela babes bila. Izan ere, uste du  epaitegiek ez dutela aintzat hartu EBren araudia bere ordainsarien aurkako epaietan. «Europako legedi oro Europako instantzietan kontsultatu behar da, eta kasu horietan ez da egin, defentsa gabezia nabarmena sortuz». Oiarbidek gogorarazi du Bruselari jakinarazi ziotela zein asmo zuen, eta haren onespena jaso zuela. «Ez du inoiz bidesaria ezartzearen aurka egin»­.

Aldundiaren kudeaketa kritikatu du EH Bilduk, eta «oso larritzat» jo du «aldundiak ordainsariak kobratzen jarraitzea, berme juridikorik gabe eta aurkako epaiak izan arren».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zamaketariak eta portuko beste langileak Baionako portua blokeatzen, atzo, Tarnosen. ©PATXI BELTZAIZ

Erretreten erreformaren aurkakoek Baionako portua blokeatu dute

Iker Aranburu

Erretreta gibelatzeko proiektuari buruzko eztabaida astelehenean hasiko da Frantziako Asanblean

LABek  elkarretaratzea egin zuen azaroan, Adegiren egoitzaren atarian. ©Jon Urbe / Foku

Lehen bilera Gipuzkoako metalgintzan

Irune Lasa

Sindikatuek langileen erosahalmena bermatzeko adinako soldata igoerak nahi dituzte.

Urteko azken hiruhilekoan 9.000 lanpostu galdu dira Hego Euskal Herrian

Urteko azken hiruhilekoan 9.000 lanpostu galdu dira Hego Euskal Herrian

Jokin Sagarzazu

Bereziki zerbitzuen sektorean nabaritu da: 22.700 langile gutxiago daude. Industriak eta eraikuntzak eutsi egin diote, eta enplegua sortzen jarraitu dute.

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...