Albistea entzun

Homofobia

Ekain Perrino: «Konorterik gabe egonda ere ni jipoitzen jarraitu zuten»

Larunbatean Basaurin jipoitu zuten gaztearekin hitz egin du Geuria-k, Hego Uribeko herri komunikabideak. Zerbait ikusi zutenei dei egin die Ertzaintzarengana joan eta salatzeko.

Berria -

2021eko ekainak 10 09:17

Ekain Perrino du izena, eta larunbatean 13 lagunen artean jipoitu zuten, «marikoi zikina» oihuen artean. Basaurin (Bizkaia) gertatu zen ezbeharra: Bizkotxalde parkean izan zen, 2:30 inguruan. Perrino bere lagunekin zegoen, festa giroan, eta harmailetatik beherantz joan zenean topatu zen erasotzaileekin: konorterik gabe utzi zuten, eta ospitaleratu egin behar izan zuten. Geuria Hego Uribeko herri komunikabideak elkarrizketatu du, eta, hor esan duenez, «poliki-poliki burua altxatzen» ari da. Gaur 19:00etan erasoa salatzeko manifestazioa egingo dute Basaurin.

Ez du ezer gogoratzen, eta, horregatik, laguntza eskatu die jazoera lazgarri hura ikusi zuten herritar eta adinkideei: «Lurrean nengoen, ez nuen ezer ikusi. Beraz, eskatuko nieke, hemen, harmailetan, zeuden gazte guztiei Ertzaintzarengana joatea eta zer pasatu zen kontatzea». Erasoari buruzko edozein pista baliagarria eta lagungarria izan daitekeela esan du, eta horrelakoak salatu egin behar direla. Halaber, adierazi du beldurra ere baduela: «Beldurra ematen didana da nik ez dakidala haiek zeintzuk diren, baina haiek badakite ni nor naizen. Niregana etor daitezke».

Erasoaren nondik norakoak zabaldu eta berehala egin zuen eztanda albisteak: azken egunotan bolo-bolo ibili da sareetan, eta erasotzaileekiko gaitzespen mezuak eta biktimarekiko babes zein elkartasun mezuak nagusitu dira. Erasotzaileak biktimaren adin berekoak dira: lehenik haietako bat hasi zen hura jipoitzen, eta gero gehitu ziren beste hamabiak. Jarraian, Azbarren auzorantz ihes egin zuten, Perrino konorterik gabe eta lurrean botata utzita. «Konorterik gabe egonda ere ni jipoitzen jarraitu zuten», adierazi du.

«Berriz ere ez gertatzeko»

Hala eta guztiz ere, indartsu agertu da: «Orain hemen nago, zer gertatu den kontatzeko, eta, batez ere, berriz ere ez gertatzeko». LGTBI+ Komunitatearen Nazioarteko Eguna iristear den honetan, gaur egungo jendarteari buruz mintzatu da Perrino: «Gizartea bera aldatu dela uste dut, baina horrelakoak gertatzen direnean ikusten da gehiago aldatu behar dugula». Hain justu ere, horregatik kontatu du larunbat goizaldean egin ziotena, oraindik ere horrelako erasoak gertatzen direla adierazteko, eta erasotzaileak zigorgabe ez gelditzeko. «Ez diogu borrokatzeari utzi behar».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Milaka lagun elkartu dira gaurko mobilizazioan Bilbon. ©Monika del Valle / Foku

Osakidetza «desegiten» ari dela salatu dute sindikatuek Bilbon

Berria

SATSE, ELA, LAB, CCOO, UGT eta ESK sindikatuek deitu dute manifestazioa, eta milaka lagun elkartu dira. Osasun publikoaren alde egin dute, eta hura pribatizatzeko joera gaitzetsi.

 ©BERRIA
Miarritzeko harrotasunen martxa, atzo. ©BOB EDME

«Mugak hausteko» harrotasunez hartu dituzte Miarritzeko karrikak

Oihana Teyseyre Koskarat

Ehunka lagun bildu dira harrotasunaren martxan. LGTB komunitateko eragileek nabarmendu dute gora egin dutela horien kontrako erasoek

Barakaldon eraso matxisten aurka egindako elkarretaratze bat, aurtengo martxoan. ©MARISOL RAMIREZ / FOKU

Gizon bat espetxeratu dute, neska lagun ohia hiltzen saiatzea egotzita

Jon O. Urain - Maddi Ane Txoperena Iribarren

Labanaz eraso dio andreari, eta emakumea larri dago, Gurutzetako ospitalean. Basauriko kartzelan sartu dute gizona. Mugimendu feministak elkarretaratzera deitu du gaur arratsalderako Barakaldon

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...