Albistea entzun

Migratzaileak

Adingabeak Marokora bidaltzea erabaki dute Sanchezek eta Vivasek

Espainiako eta Ceutako presidenteek adostu dute Atzerritartasun Legearen arabera egitea kanporatzeak, epaitegiek horiek gelditu ostean.

Pedro Sanchez Espainiako presidentea eta Juan Jose Vivas Ceutako presidentea Moncloan, gaur goizean.
Pedro Sanchez Espainiako presidentea eta Juan Jose Vivas Ceutako presidentea Moncloan, gaur goizean. Juan Carlos Hidalgo / EFE Tamaina handiagoan ikusi

Maddi Iztueta Olano -

2021eko abuztuak 25

Espainiako Gobernuko presidente Pedro Sanchez eta Ceutako presidente Juan Jose Vivas Moncloan gaur goizean bildu dira, iragan maiatzean Ceutara iritsitako milatik gora migratzaileren egoerari irtenbide bat aurkitzeko asmotan. Sanchezek konpromisoa hartu du Ceutan dauden adingabeko migratzaileak Marokora itzularazteko. Horretarako, presidenteak iragarri du «Estatuaren ahalmen eta baliabide guztiak» baliatuko dituztela.

Bileraren ostean emandako prentsaurrekoan, Vivasek eskerrak eman dizkio Sanchezi, auziaren aurrean adierazitako elkartasunagatik: «Sanchezek badaki gehiegi luzatu den eta jasanezina bihurtu den egoera baten aurrean gaudela, eta, horregatik, berehalako konponbideak behar ditugu». Halaber, PSOEko buruak izandako «erantzun azkarra» txalotu du, eta nabarmendu Ceutan gertatzen ari dena «estatu osoko arazoa» dela.

Gainera, Vivasek ohartarazi du «egoera jasanezina» dela Ceutaren tamainako hiri batentzat, eta auziari «aurre egiteko baliabide gutxi» dituztela—iragan maiatzean 12.000 migratzaile iritsi ziren—. Horiek hala, Vivasek berretsi du irtenbide bakarra adingabeak Marokora itzularaztea dela, eta horretarako legearen urratsei jarraituko dietela. Halaber, adierazi du «adingabeen interesa» lehenetsiko dutela.

Espainiako Gobernuko bozeramaile Isabel Rodriguezek defendatu egin du Vivasek eta Sanchezek hartutako erabakia: «Garrantzitsuena adingabeak haien senitartekoekin elkartzea da, eta are gehiago orain, ikasturtea hastear den honetan». Hainbat GKE gobernuz kanpoko erakunderen arabera, baina, Marokok ez ditu nerabeak artatzeko «baliabide duinak».

Abuztuan egindako kanporaketen inguruan, Vivasek bere administrazioaren eta gobernuaren lana defendatu du goizeko agerraldian, esanez Espainiako eta Marokoko agintariek deportazio horiek «babestu» zituztela. Ildo beretik, adierazi du «adingabeko migratzaileen kanporaketa» ez dela legez kanpokoa, eta «urrats jakin batzuei ez jarraitzea» izan zela gaizki egindako bakarra.

Legez kanpoko prozesua

Abuztuaren hasieran hainbat GKEk dozenaka adingabeko migratzaile legez kanpo kaleratzea egotzi zioten Ceutako Gobernuari. Horrek Ceutako eta Espainiako gobernuak astindu zituen, eta bide eman zien alde bateko eta besteko kideen ika-mikei: Espainiako Barne Ministerioak eta Ceutako Gobernuak elkarri egotzi zioten ekintza horien erantzukizuna.

Deportazioak ikertu eta prozesua aztertu bitartean, migratzaileen kanporaketak geldituta egon dira bi aste hauetan. Ceutako Administrazio Auzitegiak asteartean jakinarazi zuen abuztuaren 16an kanporatu behar zituzten bederatzi adingaberen deportazioak bertan behera uztea erabaki zuela.

Hain zuzen, Ceutako Administrazio Auzitegiak ikertu du azken egunotan autonomia erkidegoko administrazioak hasitako kanporaketa prozesua. Astearteko ebazpenean adierazi zuen Vivasen Administrazioak legez kanpoko urratsak egin zituela: batetik, ez zuen Atzerritarrei Buruzko Legea bete, eta, bestetik, ez zituen Marokotik bakarrik joandako nerabe bakoitzaren kasuak banan-banan ikertu.

Horrez gain, epaileak adierazi zuen Ceutako Gobernuak ez ziela deportazioen berri eman ez adingabeei, ezta Fiskaltzari ere, eta gogorarazi zuen «funtsezko printzipioetako bat legeak beren osotasunean betetzea» dela, eta administrazio guztiek dutela betebehar hori, «salbuespenik gabe».

Ceutako Gobernuak birritan nabarmendu du 2007ko Marokoren eta Espainiaren arteko akordioan oinarritu zela Marokotik iritsitako adingabeak herrialdetik kanporatzeko; akordio horren gainetik dago, baina, Haurren Eskubideen Nazio Batuen Konbentzioa. Nazioarteko araudiak agintzen du inor kanporatu baino lehen bakarrik migratu duen adingabeko bakoitzaren kasua banan-banan ikertu behar dela.

Legez kanpoko kanporatzeek kritiken erdigunean jarri zuten Barne Ministerioa. Hala ere, gaur goizean Barne ministro Fernando Grande-Marlaskak beste behin berretsi du haren departamentuak ez duela eskumenik «kanporatzeei buruzko erabakirik hartzeko», eta adierazi du gobernuak ebazpen judizialei men egingo diela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lurrikarek eragindako kalteei so.

5.000tik gora dira oraingoz Ekialde Hurbileko seismoetan hildakoak

Arantxa Elizegi Egilegor - Mikel O. Iribar

Gau osoan zehar lanean jarraitu dute erreskate taldeek, baina toki askotan laguntzaren zain daude oraindik. Ohartarazi dute biktima kopurua handitu egingo dela datozen orduetan. Milaka dira kaltetuak, eta 20.000tik gora zaurituak. Erdoganek hiru hilabeteko larrialdi egoera ezarri du hamar probintziatan.

«Herrialdearen historiako lurrikararik okerrena izan da hau»

«Herrialdearen historiako lurrikararik okerrena izan da hau»

Orsola Casagrande

Kurdistanen krisi mahaia eratu du HDP alderdiak, laguntza kudeatu eta kaltetutako eremuetara iristeko. Aterpeak lortzea da orain lehentasuna Sancarrentzat.

Greziako kostazainen ontzi bat, artxiboko irudi batean. ©HELLENIC COAST GUARD / EFE

Gutxienez hiru migratzaile hil eta hogeitik gora desagertu dira Lesbostik gertu

Mikel O. Iribar

Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.

Palestinar bat astelehenean Jeriko hirian izandako tiroketen arrastoei begira. ©EFE

Israelgo armadak adin txikiko palestinar bat hil du tiroz

Berria

Gazteak haien kontra tiro egin zuela adierazi dute armadaren iturriek. Urte hasieratik gutxienez 42 palestinar hil ditu Israelek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.