Albistea entzun

Eskuin muturra

Frantziako eskuin muturreko talde batek gurutze bat jarri du Orhi mendian

Frantziaren burujabetzaren aldeko aldarri gisa ezarri dute ikurra. Frantziako Alderdi Nazionalistarekin lotuta dago taldea.

Eskuin muturreko kideak, joan zen larunbaten, gurutzea jartzen Orhin.
Eskuin muturreko kideak, joan zen larunbaten, gurutzea jartzen Orhin. Croix Citadelles Tamaina handiagoan ikusi

Edu Lartzanguren -

2021eko irailak 21

Joan zen larunbatean, pertsona talde batek metalezko gurutze bat garraiatu zuen Orhi (Otsagabia, Nafarroa) mendiko tontorrera, eta han jarri zuen, besteak beste «Frantziaren burujabetzaren» ikur gisa. Atzo iragarri zuen eginikoa Croix Citadelles eskuin muturreko taldeak bere Facebookeko orrian, eta ekintza salatu dute sare sozialetako hainbat erabiltzailek.

Neofaxistek epikaz jantzi dute eginiko balentria, Facebookeko orrian: «Euskal Herrian, ekaitzari, euri erauntsiei eta hotzari aurre eginez, Croix Citadelleseko boluntarioek berriz jarri dute bere lekuan Orhiko tontorreko gurutzea».

Katalunian ibili dira orain arte eskuin muturreko kideok euren gurutzadan. Lehenengoa 2020ko irailaren 19an jarri zuten, Ipar Kataluniako Tossal Colomer mendian (2.672 metro). Geroztik, beste bi jarri dituzte.

Taldeak argudiatu duenez, «azken urteotan, gure Frantzia ederraren disoluzioa ikusten ari gara, eremu guztietan». Familiaren balioen, ondasunaren, nortasunaren eta «gure herrialdearen burujabetzaren suntsitzea» aipatzen dute horren adibide gisa.

Hondamendi horren sintomatzat hartu dituzte mendi gailurretako gurutzeen aurkako «ekintza kristianofoboak», tartean Okzitaniako Herault eskualdeko Pic Saint Loup gurutzearen oinarrian norbaitek Witch Power (sorgin boterea) esaldia idatzi izana.

«Ezin dugu egonean jarraitu halako eraso jasanezinen aurrean, hainbat presio taldek eta Frantziaren aurkako ekintzaile sutsuek eginikoak», idatzi dute Facebookeko orrian. Mezu horren ostean, dirua eskatzen dute, mendietan gurutzeak jartzen jarraitzeko.

Fronte Nazionaletik kanporatuak

Baina nortzuk dira gurutzearen eta kristautasunaren atzetik ezkutatzen diren neofaxistak?

Les Caryatides izeneko emakume taldetik sortu da Croix Citadelles egitasmoa. Euren burua nazionalistatzat daukate, eta Frantziako Alderdi Nazionalistarekin bat egin zuten 2015. urtean, hura berriz sortu zenean.

Bigarren Mundu Gerran nazien alde borrokatu zen Charlemagne dibisioaren hiru kide ohik, besteak beste, sortu zuten alderdiaren lehen agerraldia, 1983. urtean, Jean Marie Le Penen Fronte Nazionaletik bota zituztenean. Baina arrakasta gutxi izan zuten, eta 1990eko erdialdetik lozorroan egon zen alderdia.

Baina, 2013. urtean, Clement Meric militante antifaxista hil zuen neonazi talde batek Parisen, eta Frantziako Gobernuak erasotzaileekin loturiko hainbat erakunde desegin zituen. Horrek umezurtz utzi zituen eskuin muturreko hainbat militante.

2015. urtean, ordea, Fronte Nazionalaren eskuinera daudenak biltzeko dei egin zuen Frantziako Alderdi Nazionalistak, eta, geroztik, tokian tokiko hainbat talde txikik bat egin dute harekin, besteak beste Les Caryatidesek.

Jean-François Simon da gaur alderdiaren burua, eta Yvan Benedetti eleduna. azken horren urtebetetzea ospatzeko elkartu ziren asteburuan Euskal Herrian, eta uneaz baliatu ziren gurutzea eramateko Orhira. Benedettik berak garraiatu zuen gurutzea bere autoan.

Sare sozialen hainbat erabiltzailek salatu dute neofaxisten ekintza, eta haien gurutzeak zutik gutxi iraun duela nabarmendu dute.

Beste batzuek Foruzaingoari eskatu diote ikurra erretiratzeko eta isuna jartzeko ekintzaren arduradunei.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Ertzaintzak egindako ikerketaren zenbait pasarteren irudiak. ©BERRIA

Ertzaintzak lurralde antolaketaren aurkako delitua ikusi du Zaldibarren

Iñaki Petxarroman

Durangoko epaitegiari helarazitako ikerketa baten arabera, zegokion baino lur eremu zabalagoa erabili zuen Verter Recycling SM enpresak, Jaurlaritzaren eta Zaldibarko Udalaren baimenik gabe
Zaldibarko zabortegia amildu ostean bertan egin zituzten bilatze eta egonkortze lanen irudi bat. ©JAVIER ZORRILLA / EFE

Zabor azpiko 124 igerilekuak

Imanol Magro Eizmendi

Verter Recyclingek eskaturiko txosten baten arabera, amildu zenean 300.000 metro kubo ur zeuden zabortegiaren barruan. Egileen ustez, baina, ez zuen eraginik izan hondamendian.
 ©MARISOL RAMIREZ / FOKU

«Osatu dugu minbizia? Oraindik ez, baina asko laguntzen ari gara»

Irati Urdalleta Lete

Aparteko kezka sortzen duen gaitza da minbizia, eta hori ikertzen aritzen da Zubiaga. Gaixoen biziraupena hobetuko bada, hiru norabidetan lan egiteko beharra ikusten du: diagnostiko goiztiarra, terapia zuzenduak eta txertoak.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.