Albistea entzun

Alderdi abertzaleek Puigdemont askatzeko eskatu dute

Bilduk eta EAJk babesa agertu diote, eta Jaurlaritzak esan du afera politiko bat judizializatzearen ondorio dela atxiloketa. «Atsegina» agertu du Carlos Iturgaiz PPko EAEko presidenteak.

Otegi eta Ortuzar, elkarrekin, irailean egindako mahainguru baten harira
Otegi eta Ortuzar, elkarrekin, irailean egindako mahainguru baten harira Juan Herrero / EFE Tamaina handiagoan ikusi

Berria -

2021eko irailak 24

Carles Puigdemont Kataluniako presidente erbesteratuaren atxiloketak erreakzio soka luzea ekarri du Hego Euskal Herriko alderdi eta erakundeetan. Alderdi abertzaleek babesa erakutsi diote eurodiputatu independentistari, eta afera politiko bat judizializatzea deitoratu eta elkarrizketarako deia egin du Josu Erkoreka Eusko Jaurlaritzako lehendakariorde eta Segurtasun sailburuak. Carlos Iturgaiz PPko EAEko presidenteak «atsegina» agertu du atxiloketaren inguruan, eta Pedro Sanchez Espainiako presidenteari leporatu dio Puigdemonti «amnistia eman edo indultatzeko» moduaren bila aritzea.

Andoni Ortuzar EAJren Euskadi Buru Batzarreko presidenteak Twitter sare sozialean zabaldu duen mezu batean jakinarazi du Jordi Sànchez JuntsxCateko idazkari nagusiari dei egin diola Puigdemonten atxiloketaren inguruan elkartasuna adierazteko, eta presidente erbesteratua aske utzi dezatela eskatu du. Era berean, «elkartasuna» helarazi die Puigdemonti eta haren inguruari, bere eta alderdiaren izenean.

Maddalen Iriarte EH Bilduren Eusko Legebiltzarreko bozeramaileak elkartasuna adierazi dio Puigdemonti, eta erran du gertatutakoa «eskandalagarria» dela eta «Europako epaileek agindutakoaren aurka» doala. Espainiako Estatuak Europa eta Italia «engainatu» dituela salatu du. Arnaldo Otegi EH Bilduko koordinatzaile nagusiak «babesa» agertu dio Italiako segurtasun indarrek Sardinian atxilotutako presidente erbesteratuari, eta «elkartasuna eta indarra» helarazi dizkio.

Carlos Iturgaiz EAEko PPko presidentea «pozik» agertu da Carles Puigdemonten atxiloketarekin, baina Pedro Sanchez ezagututa «indultua edo amnistia nola eman» bilatuko duela ohartarazi du, «bere kide kolpista nazionalistek eskatzen duten bezala». Iturgaizek ere Twitterren eman du lehen erreakzioa.

LAB sindikatuak eskatu du berehala askatzeko Kataluniako presidente ohia. «Ez dugu uste atxiloketa hori kasualitatez egin dutenik, Kataluniako Gobernuaren eta Madrilgoaren arteko elkarrizketa mahaia zabaldu den honetan». Espainiak erabakitzeko eskubidea onartzen ez jarraitzea deitoratu du sindikatuak, eta «errepresioa ez gelditzea».

«Politika judizializatzea»

Josu Erkoreka Eusko Jaurlaritzako lehendakariorde eta Segurtasun sailburuak ostiral honetan adierazi duenez, Puigdemont atxilotu izana «arazo politiko bat judizializatzearen» ondorioetako bat da. Euskadi Irratian egindako elkarrizketa batean, Erkorekak gogorarazi du bere garaian salatu zuela, «izaera politikoko arazo bat epaitu zenean», hori ez zela «bide egokia», eta berretsi du arazo politikoek «konponbide politikoak» behar dituztela. Zentzu berean, Kataluniak behar duena «elkarrizketa» dela erran du. Haren iritziz, «logikoa» da pentsatzea presidente erbesteratuaren atxiloketak ez duela «ondorio onik» izango Espainiako eta Kataluniako gobernuek abian jarri duten elkarrizketa mahaian.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Biktimen aldeko suontzia piztuta, atzo, Eusko Legebiltzarrean. ©BERRIA

Eusko Legebiltzarrak ez du lortu ETAren aurka agiri instituzional bat adostea

Edurne Begiristain

EH Bildu ez da batu legebiltzarrak ETA «gaitzesteko» onartutako testura. EAJ, PSE-EE, EP-IU, PP-C's eta Voxen babesa izan du proposamenak
Ezkerretik eskuinera, Jose Babiano, Javier Buces, Imanol Satrustegi eta Eider Landaberea, atzo, Bilbon. ©ARITZ LOIOLA / FOKU

Iraganari beha gaurko talaiatik

Gotzon Hermosilla

'Historia, giza eskubideak eta indarkeria politikoa' izeneko jardunaldiak egiten ari dira Bilbon, EHUko Unesco Katedrak eta Aranzadi elkarteak antolatuta. Lehenengo ekitaldian, frankismo berantiarreko, trantsizioko, eta demokrazia eta parlamentarismo garaiko bortxa politikoa aztertu dute.
 ©JON URBE / @FOKU

Beste «pauso» bat «etxerako bidean»

Oihane Puertas Ramirez

Euskal presoen eskubideen aldeko manifestaziora deitu du Sarek biharko, 17:00etan, Donostian. Espetxe politikaren aldaketa «sendotzeko» eskatuko dute
Hiriburuko polizia operazioa. ©B. EDME

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.