Joan den larunbatean aurrez aurreko bisita bat egin ondotik konfinatu egin zuten Ibai Aginaga euskal presoa, bertze bi presorekin batera, eta, hori salatzeko, gose eta egarri greba abiatu zituen presoak, Tinko taldeak atzo jakinarazi zuenez. Bada, talde horrek berak zabaldu duenez, Basauriko kartzelako zuzendaritzak erabaki du ezarritako bakartzea bertan behera uztea, eta, beraz, presoak gose greba egiteari utzi dio. Taldeak azaldu du PCR proba bat egin diotela Aginagari, eta negatibo eman ondotik atera dutela konfinamendutik. Harekin batera konfinatuta zeuden bertze bi presoek bakartuta segitzen dute, ordea.
Tinkok uste du presoak abiatutako protestaldiaren ondorio dela konfinamendutik atera izana: «Ibaik familiari adierazitakoaren arabera, argi dauka arazoa kalean argitara ematearen ondorio izan dela kartzelako zuzendaritzak berarekiko izan duen jarrera aldaketa, eta eskerrak adierazi nahi dizkiela horretarako zarata egiten ibili direnei».
Koronabirusaren pandemiaren ondorioz ohikoa da presoak aurrez aurreko bisiten edo lekualdatzeen ondotik konfinatu behar izatea.
