BERRIAko irakurleek blog berri bat izango dute aurrerantzean webguneko blog plataforman: Biziz. Jon Rodriguezek eta Pello Alberdik urtebetean munduan zehar bizi izandako esperientziak kontatuko dituzte hor. Pedalkadaka eginen dute bidea; begiak erne eta belarriak zorrotz. Gipuzkoako bi gazte dira, Mondragon Unibertsitatean ingeniaritza industriala ikasiak, eta graduondokoa bukatzear dira gaur egun. Ikasketen hondarrean direla, proiektu bat jarri dute martxan biek ala biek: Biziz. Afrikako eta Asiako txokoak ezagutzea da asmoa, bizikletarekin batetik bestera mugituz, urtebeteko bidaian; helburu nagusia, bertako Gobernuz Kanpoko Erakundeen lana ezagutzea eta oihartzuna ematea.
Ikusi gehiago: «Oihartzuna eman nahi diogu zenbait GKEk egiten duten lanari»
Rodriguezek eta Alberdik kontatu dutenez, bidaiak bi zati nagusi izanen ditu. Irailetik abendura artekoa izanen da aurrena, eta Hegoafrikatik Kenyara arteko ibilbidea egitea da helburua. Halaber, urtebeteko bidaiaren bigarren partean Thailandiatik Kirgizistanera joanen dira bi gazteak. Hain zuzen, bidaiaren lehen zatitik bigarrenera arteko saltoa egiteko baizik ez dute erabiliko bizikletaz besteko garraiobiderik; hegazkinez eginen dute urrats hori.
Parte hartzaileek ez dute nahi bidaian ikusiak eta ikasiak eurentzat baizik ez izaterik. Kontrara, bozgorailu izan nahi dute, eta sarea osatzen ari dira Euskal Herriko zenbait hedabiderekin. Tartean da BERRIA: etapaz etapa, BERRIAren Biziz blogean kontatuko dituzte bizitakoak. Dagoeneko irakur daiteke estreinako etaparen kronika: 0. etapa: Egokitzapen egunak Middelburgen.
