Urrian lau egunez egongo da geldi Landaben. Urte osoan autogintzaren buruko min izaten ari den erdieroaleen krisiak bete-betean eragiten du oraindik. Astelehenean, ez zen produkziorik izan, eta ostiralean gauza bera gertatuko da Iruñeko Volkswagen fabrikan. Halaber, langileen batzordeak jakinarazi duenez, datorren astean ere, astelehenean eta ostiralean ez da automobilik ekoitziko; hots, urriaren 25ean eta 29an.
Geldialdiok ez zeuden jasota sindikatuen eta zuzendaritzaren arteko egutegiaren azken negoziazioan. Horregatik, langileen batzordeak kezka adierazi du, krisia konpondu beharrean areagotzen ari delako.
Iragan asteko bileran zuzendaritzak azaldu zien sindikatuei motorraren zentralitarekin hornidura arazoak zituztela eta datorren astean ere arazoekin jarraitzea espero zuten. Orain, geldialdiarekin baieztatu egin da ez dutela hori konpondu.