Beste eraso matxista bat Euskal Herrian. Ertzaintzak jakinarazi duenez, Zarautzen (Gipuzkoa) gizonezko bat atxilotu dute emakumezko bati sexu erasoa egitea leporatuta. Emandako datuen arabera, erasoa igande goizaldean gertatu zen, Zarautzen. Poliziek egunean bertan eraman zuten gizona atxilo, eta, jakinarazi dutenez, asteartean pasatu zen epailearen aurretik, Azpeitiako (Gipuzkoa) Auzitegian.
Zumaiako Udalak ohar baten bidez jakinarazi du erasoaren biktima Zumaiakoa (Gipuzkoa) dela, eta, erasoa gaitzesteko, protestara deitu du gaur. Zumaiako Mugimendu Feministarekin batera zabaldu dute deialdia: bihar eginen dute mobilizazioa, 19:00etan, Beheko Plazan.
Halaber, erasoa Zarautzen gertatua izaki, herriko udalak adierazpen instituzional bat atera du argitara. Udalak babesa azaldu die biktimari eta haren hurbilekoei, eta «gogor» gaitzetsi dute erasoa. «Erakunde gisa, udalak argi eta garbi adierazten du ez duela inondik ere onartuko emakumeen giza eskubideen urraketarik». Halaber, nabarmendu dute emakumezkoen kontrako indarkeria «egiturazko arazo baten ondorio» dela. Elkarretaratzera deitu dute biharko. Eguerdian biltzera deitu dituzte herritarrak, Zarauzko Lege Zaharren plazan. Halaber, oharrean herritarrei eskatu die «publikoki erakuts dezatela emakumeen eta gizonen arteko berdintasunaren aldeko eta indarkeria matxistaren aurkako konpromisoa».