Albistea entzun

Epaiketa

Epaileak ebatzi du ez dela frogarik Egoitz Urrutikoetxea ETAko kide izan zela errateko

Bi urteko presondegi zigorrera kondenatu du Parisko Zigor Auzitegiak, betetzeko beharrik gabe. 2003an eta 2005ean ETArekiko «sinpatia» zuela eta etakideekin harremanetan egon zela erran du epaileak. Zigorrak ezartzeko epailearen deialdietara joan beharko du urte batez

Egoitz Urrutikoetxea, artxiboko argazki batean
Egoitz Urrutikoetxea, artxiboko argazki batean Bob Edme Tamaina handiagoan ikusi

Ekhi Erremundegi Beloki -

2021eko azaroak 17

Parisko Zigor Auzitegiko epaileak ebatzi du ez dagoela frogarik 2003an eta 2005ean Egoitz Urrutikoetxea ETAko kidea izan zela errateko. Bi urteko presondegi zigorra eman dio, hala ere, ezker abertzaleko kideari, betetzeko beharrik gabe. Epailearen iritziz, frogatua gelditu da Urrutikoetxeak ETArekiko sinpatia zuela, eta garai hartan etakideekin harremanetan izan zela. Elementu horiek aski izan zaizkio gaizkile elkarteko kide izateagatik erruduntzat jotzeko. Orain, zigorrak ezartzeko epailearekin izanen du orain Urrutikoetxeak; haren deialdietara joan beharko du urte batez, eta lanean edo ikasten ari dela frogatu beharko du. Azkenik, Fijait arau hauste terroristen egileen Frantziako fitxategi judizial automatizatuan ez sartzea erabaki du epaileak.

Ulertu ezina eragin lezake epaitegiaren erabakiak. Hain zuzen ere, Urrutikoetxea ETAko kide izan ez bazen, zer erakundetako kide izateagatik ebatzi dute gaizkile elkarteko kide izan zela? «Nik ere ez dut ulertzen», erantzun du, ironiaz, Laurent Pasquet-Marinecci defentsako abokatuak. «Epaitegiak erran du ezin dela frogatutzat eman garaian ETAko kide izan zela; beraz, judizialki ez da ETAko kidea. Baina akusazioen garaian erakunde armatuarekiko sinpatia zuela ebatzi du epaileak, eta ETAko kideekin eta arduradunekin harremanetan egon zela. Hori da argumentua gaizkile elkarteko kide izan zela errateko», esplikatu du. «Biziki analisi arriskutsua da. Atea irekitzen dio edozein gehiegikeriari; ez gara pentsamenduaren poliziatik urrun. Ideologia da».

Adibide bat eman du: «Demagun kazetari bat, edo ikerlari bat, erakunde armatu batetiko sinpatia duena, eta erakunde horretako kide batzuekin harremanean dena. Erabaki honen arabera, gaizkile elkarteko kide izateagatik zigortzen ahalko lukete». Sinpatiarena «biziki nozio lausoa» dela azpimarratu du. «Egoitz Urrutikoetxea ez dute zigortu egin duenagatik, izan denagatik baizik», ondorioztatu du. Ildo beretik jo du Urrutikoetxeak berak ere, eta «kezkagarria» dela erran du: «Bide bat ireki dute». Hala ere, erabaki «positiboa» dela erran du, prokuradorearen eskaria erdira jautsi duelako epaileak, eta ez dutelako Fijaiten sartu.

EH Baik, ohar batean, deitoratu du Urrutikoetxearen auziaren gisakoek bere horretan segitzea Aieteko Adierazpenaren hamargarren urteurrenean. «Aietek bidea ireki zion Euskal Herrian gatazka armatu baten baldintzak gainditzeko sekuentziari, eta sekuentzia horretan irekiak diren prozedura judizialek lagungarriak izan behar dute euskal preso eta iheslarien etxeratzearen aldeko urratsak egiteko. Ez militante politikoak kartzelatzeko mehatxuak». Azpimarratu dute Urrutikoetxea zigortu egin dutel, kartzelatuko ez badute ere. «Eskatzen dugu bertan behera gera daitezela haren aurkako prozedura judizial guziak, eta, bide beretik, Parisi eta Madrili zuzentzen gatzaizkie, eta eskatzen diegu Euskal Herrian irekia den fasearen aldeko urratsak egin ditzatela».

Otsailean dei auzitegian

Joan den urriaren 8an eta 9an epaitu zuten ezker abertzaleko militantea, 2003 eta 2005 artean ETAko kide izatea eta «helburu terroristak» zituen gaizkile elkarte bateko kide izatea leporatuta. Terrorismoaren aurkako Frantziako fiskaltzako prokuradoreak adierazi zuen ez ziola «zentzurik ikusten» Urrutikoetxea kartzelan sartzeari, baina haren kontrako akusazioak funtsatuak direla kontsideratuta, lau urteko kartzela zigorra eskatu zuen haren kontra, betetzeko beharrik gabe. Laure Heinich eta Laurent Pasquet-Marinacce defentsako abokatuek salatu zuten «ezdeusak» zirela aurkeztutako elementuak, eta ez dagoela «inolako zantzurik» frogatzeko Urrutikoetxea etakide eta gaizkile elkarteko kide izan zela; errugabetzat jotzeko eskatu zuten.

Joan den urrikoa ez da Egoitz Urrutikoetxeak Parisen duen afera judizial bakarra. Heldu den otsailean ere epaitzekoa dute Parisko Dei Auzitegian. 2005ean ETArekin harremana izatea leporatzen diote.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Euskal Hiriguneko biltzarra, joan den abenduan. ©GUILLAUME FAUVEAU

Euskal Elkargoa gainditu beharra

Ekhi Erremundegi Beloki

Euskal Hirigune Elkargoak bost urte beteko ditu igande honetan. Ipar Euskal Herriak izan duen lehen instituzio propioa eraikitze fasetik politika publikoak ontzera iragan zen 2020ko hauteskundeen ondotik, baina, anitzen ustez, bere mugak erakutsi ditu jadaneko.
Izadi haurraren alde joan den azaroan Burlatan egindako jaialdi bat. ©IDOIA ZABALETA / FOKU

Amarik gabeko urtebetetze eguna

Maddi Ane Txoperena Iribarren

Maria Lizarraga eta Iñigo Gutierrez euskal presoen alaba Izadik bihar beteko ditu 3 urte. Kartzelatik atera beharko du orduan, Espainiako espetxe legediak hala aginduta, eta amarengandik bereizi. Gutierrez atzo atera zen espetxetik, hirugarren graduan.
Aurreneko lerroan, ezkerretik, Gorka Urrutia, Beatriz Artolazabal eta Jose Ramon Intxaurbe, atzo. ©MARISOL RAMIREZ / FOKU

Espainiako segurtasun indarren lana balioesteko eskatu diote Jaurlaritzari

Gotzon Hermosilla

Txosten bat egin dute ETAk Guardia Zibilean eta Espainiako Polizian eragindako sufrimenduaz

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.