Errepublikaren aldeko protestak egingo dituzte astelehenean

Datorren astelehena, abenduaren 6a, Espainiako Konstituzioaren eguna izaki, protestara deitu du Arabako, Bizkaiko eta Gipuzkoako Mugimendu Errepublikanoak. Hiru eskaera nagusi egingo dituzte: monarkia bertan behera geratzea, prozesu konstituziogile bat abiatzea eta errepublika aldarrikatzea. Donostiako Ijentea kalean eta Gasteizko Andre Maria Zuriaren plazan egingo dituzte kontzentrazioak, 12:00etan eta 13:00etan hasita, hurrenez hurren.

Gaur taldeak Donostian egin duen prentsaurrekoan gaitzetsi duenez, monarkia «desberdintasun sozialen, lurralde gatazken eta ustelkeriaren zutabeetako bat» da aspaldidanik. Eredu hori ez dute begi onez ikusten: «Eredu horrek ez die erantzuten herritarren beharrei, eta auzitegiek ikertu behar dituzte zuzenbidearen aurkako haren ustezko jarduerak». Hori horrela, monarkia deuseztatzearen aldeko mezua zabaldu nahi dute: «Bada garaia monarkiari amaiera emateko, eta prozesu konstituziogile erabat demokratiko bati ekiteko». Proposatu dute prozesu horren ostean errepublika federala sortzea: «Prozesu horren emaitza errepublika federala izango da, gehiengo sozial langilearen zerbitzura eta herrien autodeterminazio eskubidea errespetatuko duena: Hirugarren Errepublika».

Helburu hori lortzeko bidea urratu nahi dute asteleheneko protestekin: «Abenduaren 6an monarkiaren aurka mobilizatzera eta prozesu konstituziogile bat aldarrikatzera dei egiten dugu, berdintasun sozioekonomikoan eta printzipio demokratikoekiko errespetuan oinarritutako eredu errepublikanoa lortzeko».