Aurrerantzean, omikron aldaerarekin kutsatu diren pertsonen kontaktu estuek ez dute bakartu beharko Hego Euskal Herrian, COVID-19aren aurkako txertoaren pauta osoa baldin badute. Espainiako Osasun Ministerioak eta autonomia erkidegoko osasun arduradunek hartu dute erabakia, bihar egitekoa den batzarraren aurretik. Orain arte, hamar egunez bakartzeko beharra zuten omikron, beta eta gamma aldaerekin kutsatutakoen kontaktu zuzenek, baina protokolo hori aldatzea adostu dute autonomia erkidegoek.
Praktikan, baina, eragin eskasa izan dezake erabakiak. Izan ere, kutsatu diren gehienei ez zaie aldaerari buruzko informaziorik ematen, eta, hortaz, neurri berberak ezarri izan zaizkie denei. Ikusgai dago hori ere aldatuko den biharko bilkuraren ostean.
Etxean geratu beharrean, omikron aldaeraz kutsatu den edonoren kontaktuei aholkatuko zaie ahalik eta gehien murrizteko harreman sozial guztiak, etxetik kanpoko jarduerak ezinbestekoetara murriztea, prebentzio neurriak zorrotz betetzea eta erreparatzea ea sintomarik agertzen den.
