Igande goizean hil da Xanti Iparragirre Perurena euskaltzalea (Errenteria, Gipuzkoa, 1934 - Eskoriatza, Gipuzkoa, 2022), 87 urterekin. Azken egunak ospitalean egin ditu, eta, azkenean, bere baserrian hil da. Euskaltzalea eta abertzalea zen, iheslari politikoa, baita bertso eskolen sortzailea ere. Azken agurra asteartean egingo diote, 19:00etan, Eskoriatzako San Pedro elizan.
Marixol Iparragirre euskal presoaren aita ere bazen Xanti, eta hura espetxetik Eskoriatzara eraman dute aita agurtzeko.
Errenteriako Añarbe auzoan jaio zen, eta hamar anai-arrebetatik zazpigarrena zen Iparragirre. Eskoriatzara ezkondu zen 1959an, eta bost seme-alaba izan zituen. Han sortu zuen Euskal Herriko lehen bertso eskola, Patxi Goikolea eta Juanito Akixorekin batera.
1981an bilakatu zen iheslari politiko; Ipar Euskal Herrira ihes egin zuen, eta sasian ibili zen 2003ra arte. Iparraldean hainbat urtez izan zen bertso irakasle, eta, 2008an Amets Arzallusek lehenengo Xilaba irabazi zuenean, Iparragirrek berak jantzi zion txapela.
Agurra
Hil berritan, hainbat izan dira sareetan Iparragirreri azken agurra eman diotenak. Bertsozale elkarteak, adibidez, «bertsolaritzaren alde egindako guztia» eskertu dio.
Xanti Iparragirre Perurena joan zaigu 87 urterekin.
— Bertsozale Elkartea (@Bertsozale) January 2, 2022
Hileta elizkizuna urtarrilaren 4an izango da, 19:00etan, Eskoriatzako San Pedro parrokian.
Mila esker Xanti bertsolaritzaren alde egindako guztiarengatik.https://t.co/PPzHuBEBL8#bertsolaritzapic.twitter.com/XUUBClFQzS
Arnaldo Otegi EH Bilduko idazkari nagusiarentzat, berriz, «herritarra eta herrigilea, euskalduna eta abertzalea» izan da Iparragirre: «Ohore bat izan da bidearen zati handi bat zurekin partekatzea».
Gaur Xanti Iparragirre joan zaigu. Herritarra eta herrigilea, euskalduna eta abertzalea. Ohore bat izan da bidearen zati handi bat zurekin partekatzea. Nire doluminak senideei eta lagunei. Irabazi arte! pic.twitter.com/Hxvl2jdju3
— Arnaldo Otegi 🔻 (@ArnaldoOtegi) January 2, 2022
Sareetan beste hamaika erabiltzailek ere izan dute gogoan Iparragirre. Irulegiko Irratiak, adibidez, joan den urrian harekin izandako solasaldia izan du gogoan: «Hastapenetik egin dudan bizian, legearen barnean ez naiz ibili. Legea barrendik ez dut ezagutu».
Luzaz ipar euskal herrian errefusiaturik egon den Xanti Iparragirre pausatu da! Joan den urrian izan ginen harekin solasaldi baten grabatzerat Eskoriatzarat. @euskalirratiakpic.twitter.com/F6pNn73WxI
— Irulegiko Irratia (@Irulegiko) January 2, 2022
