Albistea entzun

Etxebizitza

Alokairua arautzeko etxebizitza lege berria hitzartu dute Nafarroan

PSNk, Geroa Baik eta Ahal Dugu-k lege proiektua erregistratu berri dute Nafarroako Parlamentuan. 2010eko legea berritu nahi dute, eta, besteak beste, alokairuen iraunkortasunerako indizea edo alokairu kontratuen erregistroa sortzea proposatu dute.

Ana Ansa (Geroa Bai), Jose Maria Aierdi Etxebizitza kontseilaria, Arantza Biurrun (PSN) eta Mikel Buil (Ahal Dugu), gaur, Iruñean, Nafarroako Parlamentuan.
Ana Ansa (Geroa Bai), Jose Maria Aierdi Etxebizitza kontseilaria, Arantza Biurrun (PSN) eta Mikel Buil (Ahal Dugu), gaur, Iruñean, Nafarroako Parlamentuan. Jagoba Manterola / Foku Tamaina handiagoan ikusi

Joxerra Senar -

2022ko urtarrilak 17

Nafarroako administrazioak erreminta gehiago izango ditu aurki etxebizitzaren merkatua arautzeko orduan, batik bat alokairuen atalean. Nafarroako Gobernua osatzen duten hiru alderdiek —PSNk, Geroa Baik eta Ahal Dugu-k— 2010eko Etxebizitzaren Legea aldatzeko lege proiektua hitzartu dute, eta goizean erregistratu dute parlamentuan. Hiru alderdietako eledunak pozik agertu dira emaitzarekin. Jose Mari Aierdi Etxebizitza eta Lurralde Antolamenduko kontseilariak azpimarratu du legearen edukia «sakona eta aurreratua» dela etxebizitzarenaren gisako gai delikatu batean.

Proiektuak bere bidea egin behar du orain legebiltzarrean. Goizean Eledunen Batzordetik pasatu ostean, ohiko prozedurari jarraitu beharko dio: lehenik, osoko bilkuran aintzat hartu beharko da; ondoren, batzordeetatik igaro beharko du, eta azken testua osoko bilkuran eztabaidatu eta bozkatuko da. Akordioa hitzartu duten taldeek ez dutenez gehiengorik, beste taldeen babesa edo onespena beharko dute tramitazio horretan. Litekeena da, beraz, tramitazioan aldaketak sartzea. Jose Mari Aierdik onartu du EH Bilduk eta Ezkerrak negoziazioen nondik norakoen berri izan dutela.

Berritasun nagusietako bat alokairuen errenta arautzeko mekanismo berria izango da; alokairuen iraunkortasunerako indizea, alegia. Adierazle horren bitartez, gobernuak gehienezko prezio baten erreferentzia ezarriko du alokairua eskuragarri egiteko, tokiz toki. Adierazle horren zenbatekoa bi tarteren artean egongo da: urteko errenta 3.600 eurokoa izango da gutxienez, eta lanbidearteko soldata bider 1,5 gehienez.

Beste berritasunetako bat da lehen aldiz Nafarroan alokairu kontratuen erregistroa ezarriko dela. Legeak zehazten duenez, bi erreminta horien bitartez, administrazioak aukera izango du alokairuen prezioak modu egokian aztertzeko, prezioen tentsio handiko eremuak definitu ahal izateko eta horren arabera neurriak hartzeko.

Halaber, babes ofizialeko etxebizitzen kalifikazioa iraunkor egin nahi du legeak, administrazio publikoek etxebizitzekin egiten duten esfortzu horri eutsi ahal izateko. Izan ere, egun Nafarroak sustaturiko 56.000 etxebizitzetatik ia erdira murriztu da jabego publikoa (28.000, zehazki), eta legeak jabego horri eustea proposatzen du. Hala, babes ofizialeko etxea galtzeko baldintzak ere ezartzen dira: adibidez, etxea ohiko bizitoki gisa ez erabiltzea.

Espainiako legediarekin talka

Oraintxe bertan, Espainiako Kongresuan etxebizitza lege proiektua tramitazioan dago, eta Geroa Baiko Ana Ansak espero du bi legeen artean «talkarik ez egotea». Aierdik gogorarazi du Espainian etxebizitza merkatua arautzeko lehen legea ezarri nahi den bitartean Nafarroan jada «tradizio bat» eta bide bat eginda dagoela. Itxaropena agertu du eztabaida eragin dezaketen gaietan ados jartzeko gai izango direla bi administrazioak. Gaineratu duenez, «estatuko legearen musikarekin bat egiten dute» akordioa sinatu duten hiru alderdiek, batik bat prezioen tentsio handiko eremuetan alokairua arautzeko formulazioari dagokionez.

Ahal Dugu-ko Mikel Builen esanetan, Espainiako legearen filosofiara egokitzeko erremintak planteatzen ditu lege horrek. Pozik agertu da emaitzarekin, baina azpimarratu du hainbat kontutan ez direla ados jarri, eta espero du tramitazioan zuzenketa bidez beren planteamenduak onartzea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

LGTBI+fobiaren aurkako protesta. bat, Gasteizko Zabalgana auzoan. ©Jaizki Fontaneda / Foku

LGTBI kolektiboek «saretzera» dei egin dute

Jone Arruabarrena

Gorroto diskurtsoaren hedapenaz eta komunikabideek kolektiboaren aurkako erasoei ematen dieten trataeraz «kezkatuta» daudela esan dute

Irene Montero, Espainiako Berdintasun ministroa, artxiboko irudi batean. ©JAVIER LIZON / EFE

Onartu eginen dute abortuaren legea, higiene gaien zerga jaitsi gabe

Ion Orzaiz

Hileko mingarriaren ondoriozko gaixoaldia eta erditze aurreko baimena jasoko dituzte testuan. Jaurlaritzak eta EH Bilduk ontzat jo dute araua

Tomas Rubinen senideak, atzo, Bilbon, gudariaren gorpuzkiak hartu berri. ©MARISOL RAMIREZ / FOKU

Beste bost gudari identifikatu dituzte Begoñako hilerrian

Olatz Enzunza Mallona

Identifikazio xaflei esker atzeman dituzte bost gudariak. Gogora institutuak espero du 2023ko udaberrirako amaitzea identifikazio lana

Ikusgune behatokiak atzo kaleratu zuen txostenaren aurkezpena. ©RAUL BOGAJO / FOKU

Lau urtean hirukoiztu egin dira Ikusgunen salatutako eraso LGTBIfobikoak

Jone Arruabarrena

Eraso transfoboen gorakadaz ohartarazi du behatokiak, eta Diputatuen Kongresuan trans legea tramitatzean sortu zen «gorroto giroari» egotzi diote igoera

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.