EUSKAL PRESOAK

Azkarraga: «Lortu behar dugu preso guztiak aurten Euskal Herriratzea»

Euskal presoen eskubideen alde «elkarrekin» aritzera deitu du Sareko bozeramaileak plataformaren VII. batzar orokorrean. Urriaren 8an Donostiara joateko deia egin dute.

Sareren batzar orokorra, gaur, Donostian. IDOIA ZABALETA / FOKU
maddi ane txoperena iribarren
2022ko martxoaren 12a
16:14
Entzun

Iaz baino hobeki, baina oraindik helburuetatik urrun. Halaxe dago euskal presoen egoera, Joseba Azkarraga Sareko bozeramailearen arabera. Euskal presoen eskubideen aldeko mugimenduak VII. batzar orokorra egin du gaur Donostian, eta bileraren aitzinetik joandako urtearen balorazioa egin du Azkarragak. Oroitu du iaz oraindik euskal presoak zeudela Andaluziako eta Galiziako kartzeletan. Orain jada ez daude han, baina azken helburua ekarri du gogora, data ere jarrita: «Lortu behar dugu preso guztiak aurten Euskal Herriratzea». Azkarragaren ustez, legea beteta etorriko da aldaketa hori; ez Espainiako Gobernuaren «eskuzabaltasunagatik».

Euskal presoek gradu aldaketa eta baimenetan duten «blokeoa» ere salatu du Azkarragak. Izan ere, Espainiako Auzitegi Nazionala gibelera botatzen ari da aurrez espetxeetako tratamendu batzordeek emandako espetxe onurak. Azkarragaren ustez, tratamendu batzordeetako profesionalei autoritatea kendu nahi die hala Espainiako Auzitegi Nazionalak.

Sareko bozeramaileak nabarmendu du oztopo horiei guztiei «elkarrekin» egin behar dietela aurre, eta azpimarratu du negoziazio politikoa eta gizarte aktibazioa bateragarriak direla. Herritarrei mobilizatzen segitzeko deia egin die, eta iragarri du urriaren 8rako jarria dutela hurrengo protesta «garrantzitsua», Donostian. Azkarragak ohartarazi du Sarek ez dituela presoak «ahantziko»: «Arrazoi asko ditugu gure lanarekin jarraitzeko».

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.