Ohi bezala, emozio handiko bukaera izango du Itzuliak. Sailkapen nagusiko kontuak oso estu utzi zituen atzo Zamudio eta Mallabia artean jokatu zen etapak, eta gaur argituko dira galdera guztiak, Arratera bidean. Eibarreko irteeran, Remco Evenepoel (Quick Step) izango da horiz jantzita. Ikusteko dago, ordea, Arrateko helmuga nork igarotzen duen txapeldun moduan. Behin ez, bitan igoko dute mendate mitikoa, eta beste bost mendate ere gainditu beharko dituzte: Elkorrieta, Endoia, Azurki, Gorla eta Urkaregi. Lasterketako etaparik gogorrena izango da, eta onenen arteko borroka ikusgarria espero da.
Ikusi gehiago:Ion Izagirre: «Berdin jarraituz gero, podiumean amaitzeko moduan izango naiz»
Ustekabean, hondoratu egin zen atzo Primoz Roglic (Jumbo Visma), Evenepoelek erasora jo ostean. Gaur, ordea, defentsa lanean aritu beharko du flandriarrak. Eta galtza bete lan izango du, lehen zazpi postuen artean 40 segundotik beherako aldea dagoelako bakarrik. Oraindik askok egiten dute amets garaipenarekin. Evenepoelek Daniel Felipe Martinez (Ineos) du hurbilen, bi segundo eskasera. Hirugarren, berriz, Pello Bilbao (Bahrain) dago, 20ra. Gernikarra oso ondo moldatzen da halako etapa erabakigarrietan. Postu bat beherago ageri da Ion Izagirre (Cofidis), laugarren, 21era. 2019ko balentria errepikatu nahi du ormaiztegiarrak. Atzetik Aleksandr Vlasov (Bora) dauka, 22 segundora. Jonas Vingegaardek (Jumbo Visma), berriz, 29 segundo ditu galduak, eta 37 Enric Masek (Movistar). Roglic zortzigarren dago, 1.05era.
Ikusi gehiago:Erreleboka, Julen Gabiria: 'Michael'
Luzea da, beraz, irabazlegaien zerrenda, igoko dituzten mendateena bezalaxe. Hasteko, Elkorrieta altxatuko dute (2,6 kilometro eta %6,7ko pendiza), eta gero, hiru igoera gogor kateatuko dituzte: Endoia (5,3 kilometro eta %6,8), Azurki (5,1 kilometro eta %7,4) eta Gorla (9,6 kilometro eta %5,7). Hamar kilometro ordekan egin, eta Arrateko lehen igoerari helduko diote hurrena. Alde gogorretik, Azitaindik igoko dira orduan (4,1 kilometro eta %10,5). Jarraian Urkaregi gainditu beharko dute (5 kilometro eta %4,8), eta gero Arrate azkenekoz igo, ohiko errepidetik (4,5 kilometro eta %8,8). Gainean egongo da helmuga. Igoeretan indarra, jaitsieretan abilezia, eta oro har, argitasun handia izan beharko du Itzulia irabazi nahi duenak. Ahalmenak adinako garrantzia izango du estrategiarekin asmatzeak.
