Maiatzaren 8an izanen da itzulera. Bi urteko etenaren ondotik, Senpereko (Lapurdi) lakura itzuliko da Herri Urrats, Ipar Euskal Herriko ikastolen aldeko festa handia. Programazio zabala prestatu dute antolatzaileek, baina aldarrikapenerako eguna izatea ere nahi dute. Azken hilabeteetan, Seaskako kideak azkarki ari dira borrokan ikasleek azterketak euskaraz pasa ahal izateko eskubidearen alde, baina, orain arte, eskaera guziei bizkarra eman die Frantziako hezkuntza administrazioak. «Milaka pertsona hor izanen dira, ez bakarrik euskara ospatzeko, baina, erakusteko ere euskarari zer leku ematen diogun gure bizian, eta zer aldarrikatzen dugun hori egingarri bilakatzeko», adierazi du Peio Jorajuria Seaskako lehendakariak.
"Berezia" izanen da aurtengo @HerriUrrats Peio Jorajuria @seaskaikastola-ko lehendakariaren hitzetan @berriapic.twitter.com/pRFvoycQ1s
— Ekhi Erremundegi (@EkhiErremundegi) April 20, 2022
Gogor mintzatu dira Seaskako arduradunak Frantziako Gobernuaren jarreraren kontra. «Gure haurren hizkuntza eskubideen kontra egitea erabaki dute», adierazi du Jorajuriak. Brebetako eta baxoko azterketak euskaraz egin ahal izatea nahi dute. Orain arte, baxoan, Matematikako eta Historia-Geografiako probak euskaraz erantzuteko parada zuten ikasleek, baina pandemiak eragindako gorabeheren ondoren lehen aldiz aurten aplikatuko den erreformaren ondorioz, aukera hori galduko dute. Brebetan ere gibelapena egon da Frantziako Hezkuntza Ministerioa Jean Michel Blanquerrek zuzentzen duenetik: lehenago, osoki euskaraz erantzuten zituzten proba guziak; orain, zientziak frantsesez egitera behartu nahi dituzte haurrak.
Joan den asteazkenean bilkura egin zuten Seaskako kideek Anne Bisagni Faure Bordeleko (Okzitania) akademiako errektorearekin, baina bizkarra eman zien bere eskaerei. Tarteko proposamenak ere egin zituen Seaskak, baina ezezkoak baizik ez zituen jaso. «Kexu gara, biziki haserre. Eta Parisi abisua eman nahi diogu prest garela gure hizkuntza eskubideen alde, gure haurrek azterketak euskaraz egitearen alde borrokatzeko, irabazi arte», zehaztu du Jorajuriak. Abenduan Frantziako Hezkuntza Ministerioak aurkeztu zuen zirkularra, eta, EEP Euskararen Erakunde Publikoarekin eta Bordeleko errektoretzarekin Seaskak izenpetua duen hitzarmena «ez errespetatzea» leporatu die. «EEPko biltzar nagusia blokatzea ez bazen aski, Ipar Euskal Herriko hiru ikuskaritzen okupazioa ere ez bazen aski, urrunago joateko prest gara, gure oinarrizko eskubideak errespetatuak izan arte».
Egitarau zabala
Aldarrikapenez gain, besta ere izan ohi da ikastolen eguna, eta araberako egitaraua prestatu dute aurten ere Herri Urratseko antolatzaileek. Musikan lehenik: Euskal Herriko izen handiko talde andana arituko baitira Senpereko lakuaren inguruko guneetan. Xiberoots, Skakeitan, Willis Drummond eta Dupla aipatu dituzte, besteak beste, eta baita eszenatokietara itzulera eginen duen Des Kontrol ere. BERRIArekin partaidetzan osatu den Nafarroa-Badok gunean izanen dira gehienak.
Horrez gain, Albosax taldearen emanaldiaz gozatzeko parada ere izanen da, Mixel Ducau musikariaren proiektu berria. Lau albokari eta lau saxofoilari batu ditu eszenatoki gainean big band gisako orkestra bat osatuta. Araba gunean arituko dira. Genero rolez hausnartzeko parada eskaintzen duen Kimua dantza kolektiboaren emanaldia ere azpimarratu dute antolatzaileek.
Azken urteetako ikasle kopuruaren emendatzeari erantzuteko, bosgarren kolegio bat irekitzeko xedea du Seaskak. Herri Urratsen lortuko dituzten etekinak proiektu hori diruztatzeko baliatuko dituzte. Okerrik ezean, Senperen berean eraikiko dute ikastetxea, eta 2023ko ikasturte hasierarako prest egotea nahiko lukete. Gaindika egitear dagoen Ziburuko (Lapurdi) Piarres Larzabal kolegioa arindu nahiko lukete horrela.
