Mila lagunetik goiti elkartu dira gaur arratsaldean Kanbon (Lapurdi), Marienia Ez Hunki plataformak deituriko manifestazio batean, gibeletik laborariek gidaturiko 40 traktore zituztela. Laborantzarako diren lur batzuetan egin asmo duten hirigintza proiektua gelditzeko eskatu dute: 94 etxebizitza egin nahi dituzte lau hektareatan.
Office 64 Pirinio Atlantikoetako erakundea eta Bouygues Immobilier daude proiektuaren sustatzaileen artean. Laborari eta hautetsi ugari izan dira manifestazioan, baita herriko etxeko gehiengoan direnetako batzuk ere —tartean Peio Etxeleku EAJren IBB Ipar Buru Batzarreko burua ere—.
