Tortura

Foro Soziala: «Kongresuan gertatu dena guztiz gaitzesgarria da»

Macarena Olona Espainiako Kongresuko eskuin muturreko diputatuaren adierazpen polemikoak gaitzetsi dituzte Foro Sozialeko kideek. Diputatuak barre egin die torturatuei, atxiloketa bat kontatuz.

Macarena Olona, artxiboko irudi batean. MARISCAL / EFE
Nagore Arin.
2022ko apirilaren 29a
10:29
Entzun

«Kongresuan gertatu dena guztiz gaitzesgarria da, biktimizazio onartezin bat eragiten duelako. Biktima guztiek, torturatuak izan diren guztiak barne, egia, justizia eta erreparazioa merezi dituzte. Babes politiko eta instituzionala premiaz behar dira». Hitz horiekin salatu dute Foro Sozialeko ordezkariek Macarena Olona Espainiako Kongresuko eskuin muturreko diputatuak atzo, atxiloketa baten kontakizuna eginez, torturatuen inguruan egin zituen adierazpen polemikoak.

Ukrainako guduak eragindako kalte ekonomikoei aurre egiteko ekonomia plana onartu eta gutxira egin zituen adierazpen horiek eskuin muturreko diputatuak, Vox alderdiak sekretu ofizialen batzorde bat osatzeko eztabaidan hitza hartu zuenean. Hala adierazi zuen: «Torturatu egin ninduten. Ni lotan nengoen, etxean, eta, gauaren erdian, agente talde bat abisatu gabe sartu zen. Aurpegia estalirik zeramaten. Ohetik jaikitzera eta hormaren aurka jartzera behartu ninduten. Beldurra izan nuen; ez zidaten utzi ondasun pertsonalik ukitzen. Arma pila bat zituzten. Izuturik nengoen. Soinean txiza egin nuen. Torturatu egin ninduten».

Adierazpen gogor horiek, gainera, ironiaz beteriko tonu probokatzaile batean eta torturatuei barre eginez egin zituen Voxeko diputatuak: patxadaz irakurri zuen kontakizuna, poliki, esaldi bakoitzean indarra jarriz eta esaten zihoana keinu ugari eta askotarikoen bidez nabarmenduz.

Batzuen ustez, Andaluziako hauteskundeen kanpainaren aitzakian mintzatu zen tonu horretan Olona; izan ere, hauteskundeei begira dago jada, eta, atzo haren ahotik ateratakoak entzun dituztenen iritziz, horregatik igo zuen tonua ohi baino are gehiago, bere hitzen oihartzun egingo ziren kameren eta fokuen bila.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.