Albistea entzun

Ikus-entzunezkoen Legeari 45 zuzenketa txertatzea adostu dute EAJk eta Espainiako Gobernuak

Agirretxeak jakinarazi du estatuak EITBn «eskua sartzea» eragotzi dutela.

Aitor Esteban, atxiboko irudi batean.
Aitor Esteban, atxiboko irudi batean. JUAN CARLOS HIDALGO / EFE Tamaina handiagoan ikusi

Iosu Alberdi -

2022ko maiatzak 16

EAJk eta Espainiako Gobernuak akordio bat erdietsi dute Ikus-entzunezkoen Lege proiektuari zenbait zuzenketa txertatzeko. Jeltzaleek jakinarazi dute alderdiaren hiru helburu nagusiekin bat egiten duela adostutakoak: «autogobernua babestea», «EITBren autonomia mantentzea» eta «ikus-entzunezko marko berrian euskararen presentzia areagotzea». Zehazki, 45 zuzenketa adostu dituzte, eta, jeltzaleen arabera, litekeena da beste zenbait ere onartzea datozen egunetan.

EAJren Espainiako Kongresuko bozeramaile Aitor Estebanek eman du albistearen berri, Sabin Etxean egindako prentsaurrekoan. Adierazi duenez, legea «ideala» ez den arren, «kostata» lortutako akordioak euren nahiak «ase» ditu: «Arrisku handienei buelta ematea lortu dugu». Izan ere, EAJk gobernuaren proposamenari osoko zuzenketa aurkeztu zion lehenik, baina hura atzera botatzea erabaki zuten, Moncloak «hizketan hasiko zela» adierazi ostean. Hala, hasierako lege proiektu «zentralista» moldatzea lortu dutela defendatu du Estebanek, eta EITBren gobernantza mantentzeko urratsak nabarmendu ditu: «Hura kontrolatu nahi zuten Madrildik».

Joseba Agirretxea diputatuak eman ditu akordioaren xehetasunak. Jakinarazi du jeltzaleek aurkeztutako 58 zuzenketa partzialetatik 45 txertatzea adostu dutela gobernuarekin, eta beste hamarren inguruan elkarrizketak irekita dauzkatela. EITBren agintaritzari dagokionez, adierazi du bertan «eskua sartzea» eragotzi dutela: «Gobernantza gaitasuna mantentzea lortu dugu, beste telebista autonomiko batzuek izan ditzaketen mandatuen pean egon gabe». Izan ere, Agirretxeak adierazi du Gernikako Estatutuak jasotzen duela «telebista propio bat izateko gaitasuna», eta ez dagoela estatuko lege baten beharrik horretarako. Hala, azaldu du Eusko Jaurlaritzak euskal ikus-entzunezkoen esparruan dituen eskumenen inguruko aipamen bat txertatuko duela legeak.

EITBren emisio digitalen kontrolari eustea ere adostu dute bi aldeek. Agirretxeak defendatu du kontrakoak etorkizuneko emisio oro estatalizatzea eragingo lukeela, litekeena delakoan urte gutxian emisioak modu horretan egitea. Bestetik, azaldu du EITBren Nafarroako emisioek «agintaritza autonomikoa izaten jarraitzea» adostu dutela. Hura zen, EAJren esanetan, gobernuaren lege proiektuak zuen arazoetako bat. «Ikus-entzunezkoen Lege proiektutik EITBren gobernantzaren gaineko esku sartze oro ezabatzea lortu dugu», gehitu du Agirretxeak. Hala, «euskal ikus-entzunezkoen agintaritza» bermatuko dela adierazi du.

Euskararen presentziari dagokionez, diputatuak azaldu du ez dela jeltzaleek nahiko luketen presentzia bermatuko, baina jatorrizko proiektuak ezarritako bermeak handituko direla. Agirretxeak adierazi du estatuko hornitzaile publikoek, hau da, TVEk, bere emisioen %51ren %15 estatuko hizkuntza ofizialetan emititu beharko duela. Urrats bat gehiago egin dutela adierazi du hark, ordea. Izan ere, %15 hori erkidegoetako biztanle kopuruaren arabera moldatu beharko da, eta euskarak, gainerako hizkuntza koofizialek bezala, bermatua izango du emisioen %10. «Hornitzaileen esku utzita, euskarak ez zuen presente egoteko bermerik», azaldu du. Era berean, azpititulatutako eta bikoiztutako edukiei ere egin die erreferentzia, eta haiek ugaritzeko neurriak hartuko direla esan du, batez ere TVEk haurrentzat dituen edukiei dagokienez.

Hornitzaile pribatuei dagokienez, aurrerapausoak eman direla uste du Agirretxeak, eta irabazien %6 Europan egindako obretara bideratu beharko dutela adierazi du. Tartean, euskarak ere presentzia izango duela azaldu du jeltzaleak. Halere, legediak ez die eragingo egoitza estatutik kanpo duten enpresei. Kasu horietarako, EAJk gobernuarekin adostu du enpresa horrek eta hornitzaileek ardura konpromiso bat zehaztu beharko dutela, legediak hala behartzen ez badu ere, hizkuntza koofizialen presentzia bermatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Pirinioetako Bidea

Gure Esku: «Gure gailurra zortzimilakoa da»

Iosu Alberdi

Pirinioetako Bideak «herri gogoa hauspotu» duela uste du Gure Esku-k. Herritarrei dei egin diete erabakitzeko eskubidearen alde urratsak egitera.

Xavier Peytibi. / ©Maialen Andres, Foku

«Populismoak beti du gertatzen zaizun guztiaren erantzule bat»

Iñaut Matauko Rada

Ultraeskuinak zer komunikazio molde darabilen aztertu du Xavier Peytibi politologo eta aholkulariak, eta, hainbat ezaugarriren artean, patriotismoa nabarmendu du: «Haiek dira 'herria', baita herriaren defendatzaileak ere».

Marbore tontorrera iritsi berri, argiak kolokatzeko lanetan jarri ziren parte hartzaileak. ©MIKEL EGIBAR

Bide eder bat tontorrera

Iosu Alberdi

Gure Esku-k antolatutako egitasmoa bizitzeko moduak askotarikoak izan dira. Mendi garaiago edo txikiagoetara igo, lagunarteko giroa nabarmendu dute parte hartzaileek.

Bakartxo Tejeria Eusko Legebiltzarreko lehendakariak harrera egin zien Josu Etxaburu eta Amalur Alvarez Gure Esku-ko bozeramaileei ekainaren 22an. ©E. P. / FOKU

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...