Albistea entzun

Artea

Pedro Salaberri margolariak jasoko du Vianako Printzea saria

Naturaren interpretazioan oinarritutako obra piktoriko zabala osatu izana nabarmendu du Nafarroako Kultura Kontseiluak. Arte Talentua Sustatzeko saria, berriz, Sofia Esparza sopranoak jasoko du.

Pedro Salaberri margolaria, artxiboko irudi batean, 2018an.
Pedro Salaberri margolaria, artxiboko irudi batean, 2018an. Iñaki Porto / Efe Tamaina handiagoan ikusi

Itziar Ugarte Irizar -

2022ko maiatzak 20

«Paisaiaren espresioa eta giza natura interpretatzeko estetika partikular bat, hamaika erakusketatan milaka lagunek miretsi dutena». Horixe azpimarratu du Rebeca Esnaola Nafarroako Gobernuko Kultura eta Kiroletako kontseilariak 2022ko Vianako Printzea saridunaren izena iragartzerakoan. Pedro Salaberria «estilo definitu eta ezaguterrazenetakoa duen autore nafarretako bat» dela goretsi du, eta natura oinarri hartuta ondu duen margolari ibilbide sendoa ekarri du gogora. «Naturaren interpretazioari lotutako obra oparoa garatu du, paisaia eta gizakia behatuz bere margoetan, eta hori eguneroko bizitza duintzeko baliatuz», gehitu du. Ekainaren 18an egingo dute sari emate ekitaldia, Zangozan, eta Maria Txibite Nafarroako presidentearen eskutik jasoko du aitortza margolariak.

15 urterekin hasi zen lanean arkitektura estudio batean Salaberri (Iruñea, 1947). Arte eta Ofizioen Eskolan osatu zituen marrazketa eta pintura ikasketak, eta 1972ko Iruñeko Topaketetan ere hartu zuen parte. Caja Navarran jarri zuen lehen erakusketa urtebetera, eta, harrezkeroztik, hirurogei erakusketa indibidual baino gehiagotan eta beste hainbat kolektibotan erakutsi du bere lana. Antzerkia ere gertuko diziplina izan du artistak, eta eszenografiari loturiko lanetan ere jardundakoa da, baita antzezlanetarako kartelak eta disko eta liburuetarako azalak ondutakoa ere. Vianako Printzea sariarekin aitortuko diote orain lan hori guztia, baina aurretik ere jaso ditu beste zenbait sari; tartean, Eusko Jaurlaritzaren Gure Artea saria, 1984an.

Iaz berreskuratutako kopuruari eutsita, 20.000 euro jasoko ditu sarituak. Harekin batera, hautagaien artean egon dira aurten Enrique Villareal El Drogas, Jose Luis Lizarraga konpositorea eta Josu Imanol Delgado ekonomialaria.

Lirikara azkenean

Nafarroako artearen eta kulturaren esparruan gazteen lana ere ikusgarri egin asmoz, Arte Talentua Sustatzeko saria ere banatuko dute aurten, hirugarrenez: Sofia Esparza (Iruñea, 1994) opera abeslari eta sopranoak jasoko du. Kasu honetan, haren musika formazio sakona eta erakutsi duen erregistro ugaritasuna nabarmendu ditu epaimahaiak, opera eta zarzueletan interprete bezala zein bakarkako eta ganbera formatuko kontzertuetan soprano modura egin duen lana. 10.000 euro jasoko ditu.

Saria jasotzeko hautagaien artean zeuden Massil Allache, Saioa Belarra, Riart Company, Sergio Eslava, Itxaso Loinaz, Chill Mafia, Nahikari Oloriz, Edurne Pena, Andres J. Sanz, Pablo Sanchez, Taupadak eta Yago Vaillo.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA / BERRIA

Etxe berri bat euskarari

Unai Etxenausia

Gasteizko Oihaneder Euskararen Etxeak amaiera emango dio zortzi urteko ibilbideari. Elkarlana eta euskara ardatz hartuta, Arabako euskal sortzaileen akuilu izan da.
Iban Illarramendi eta Eider Perez sarituak, atzo, Iruñean. ©ETXEPARE

Iban Illarramendik eta Eider Perezek irabazi dute Etxepare saria

Erredakzioa

'Kiratsa' album ilustratuarekin eskuratu dute saria. Arkakuso baten abenturak ditu kontagai, eta Pamielak argitaratuko du lana, udazkenean
Ekainberriko labar pintura bat. ©ANDONI CANELLADA / FOKU

Historiaurre garaikide bat

Jone Bastida Alzuru

Munduko ondarea da Ekaingo kobazuloa, eta haren erreplika bisitatzeko aukera dago Zestoan: Ekainberri. Duela 13.000-14.000 urteko labar pinturen kopiak daude bertan.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...