Wikipediak euskarazko bideo pedagogiko libreak sortuko ditu

'Ikusgela' izena du proiektuak, eta, Wikipediaren webgunean ez ezik, Youtuben ere ikusgai edukiko dituzte ikasleek eta gai horietan interesa duten guztiek.

mikel p ansa
2022ko maiatzaren 24a
13:18
Entzun

«Sarean euskararen presentzia areagotzea eta euskarazko Wikipedia osatzea». Horiek dira Ikusgelaren helburuak, euskarazko Wikipediak abiatu duen proiektu berriaren asmoak. Azalpen bideo pedagogikoak landuko dituzte, eta libreak izango dira edukiak: edonoren eskura egongo dira. «Bideo guztiak eduki libreekin osatu dira, eta sortutako materiala ere librea izango da, sarean aritzeko modu baten erakusgarri», azaldu du Ander Bolibar proiektuaren koordinatzaileak.

Sarean euskarazko halako edukien hutsunea handia dela sumatu dute, eta Mundua ulertzeko bideoak leloarekin zabalduko dituzte lanak; ikasleak dituzte buruan, baina baita eduki horietan interesa duen jendea ere. «Tonu freskoa» izango dute, eta «narratiba berrietara egokitutako lengoaiak eta baliabideak» erabiliko dituzte bideoak egiteko.

Lehendabiziko bideoak bihar sareratuko dituzte, maiatzak 25. Hannah Arendt eta Simone de Beauvoir pentsalariei buruz ondu dituzte lehen bi bideo horiek. Lehen aldiz, unibertsitatera sartzeko ebaluazio azterketan sartu dituzte bi autore horiek, eta aukera egokia iruditu zaie bideo sorta horrekin hastea. Agora Filosofia Elkartearen eta EHUko Joxe Azurmendi Katedraren laguntzarekin osatu dituzte bideoen edukiak, eta Klara Badiola aktoreak jarri die ahotsa. Bideoen edukien kalitatea bermatu nahi du Ikusgelak.

Irailetik aurrera, maizago

Maiatzean bi bideo aurreratuko badituzte ere, egitasmoa irailean hasiko da indartsuago, eskoletako ikasturte berriarekin. Irail erditik aurrera ikasturteko bideo sailak aurkeztuko dituzte, eta maiztasunez joango dira bideo berriak sortzen. Filosofiari buruzkoak egin dituzte lehen bi bideoak, baina jakintza esparru gehiagotan arituko dira irailetik aurrera, beti azalpen bideo pedagogikoak eginez, «libreak eta euskaraz». Kasu batzuetan animazio teknikak erabiliko dituzte, beste batzuetan aurkezle batek gidatuko ditu.

Proiektuak badu webgune bat (ikusgela.eus), baina Wikipedian bertan ere emango dituzte bideoak, eta Youtuben kanal bat sortu dute. Sare sozialen bidez ere zabalduko dituzte bideoak. BERRIA Ikasgela webguneak ere zabalduko ditu bideo horietako batzuk. «Proiektuaren funtsa ez da edukiontzia, edukia bera baizik», adierazi du Bolibarrek. Izan ere, euskara erabiltzeko heldulekuak ematea da asmoa: euskara eremu formalean soilik erabiltzen dutenei aukera eman nahi die eremu informalean ere euskarazko edukiak ikusteko.

Euskal Wikilarien Kultura Elkarteak koordinatzen du proiektu hau, eta Eusko Jaurlaritzak diruz babesten. Hiru Damatxo ekoiztetxearen laguntzarekin ari dira bideoak egiten.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.